Charles Clerke

Dr Charles Clerke (* 22. August 1741 z Wethersfield, Essex, Ängland; † 22. August 1779 uf See vor Kamtschatka Russland) isch e britische Seefaarer gsi. Er het dr John Byron und dr James Cook uf iire Entdeckigsräise in d Südsee begläitet.

Biografii

Dr Charles Clerke isch uf ere Farm as dr viert Soon vom ene Richder z Wethersfield, won e Dorf in dr Groofschaft Essex isch, uf d Wält choo. Mit drizääni isch er uf d Royal Navy Academy z Portsmouth gange und isch Kadett worde. Im Siibejöörige Chrieg het er uf dr HMS Dorsetshire dient und uf dr HMS Bellona. 1764 bis 1766 isch er uf dr HMS Dolphin under em Kommando vom Captain John Byron um d Wält gseeglet, wo si e Hufe Insle für Öiropa entdeggt häi.

Uf dr erste Räis vom James Cook (1768–1771) isch er Midshipman uf em Schiff HMB Endeavour gsi. Uf dr zwäite Räis (1772–1775) het er as Lieutenant uf dr Resolution dient. Uf dr dritte Räis (1776–1779) isch er Captain uf dr HMS Discovery gsi.

Wo dr James Cook 1779 uf Hawaii vo de Iihäimische verstoche worde isch, het dr Clerke s Kommando über d Resolution und über die ganzi Expedizioon übernoo. Er isch gege Norde gseeglet, zum e Passaasche vom Nordpolarmeer zum Atlantische Ozean. S Packiis het en nid duure gloo und er isch zrugg uf Kamtschatka und isch vor dr Küste vo Kamtschatka an Tuberkulose gstorbe. D Liiche vom Charles Clerke isch am 29. August 1779 in dr Nööchi vom Haafe vo Petropawlowsk-Kamtschatski, Kamtschatka, Russland bigsetzt worde.

Dr zwäit Offizier uf dr Discovery, dr John Gore, het s Kommando über d Expedizioon übernoo und isch zrugg uf Ängland gseeglet. D Schiff si dört im Joor 1780 aachoo.

Weblingg

Dä Artikel basiert uff ere fräie Übersetzig vum Artikel „Charles_Clerke“ vu de dütsche Wikipedia. E Liste vu de Autore un Versione isch do z finde.