Demaratos (Bakchiade)

De Demaratos (altgriech. Δημάρατος, Dēmárātos, lat. Demaratus) isch e Aaghörige vo de korinthische Tyrannedynastii vo de Bakchiade gsii.

Lebe

De Demaratos isch e korinthische Händler gsii, wo dör de Handel mit Etrusker riich woren isch. Nochem Sturz vo de Bakchiade dör de Kypselos het er müese Korinth verloo. Er het sich denn 657 v. Chr. i de etruskische Stadt Tarquinii niderloo und en adligi Etruskeri ghüroote. Us dere Verbindig söled zwee Söö entstame, de Arruns Tarquinius und de Lucomo, wo spööter as Lucius Tarquinius Priscus König vo Rom gsii isch.

Historizität

Moderni Forscher nemed aa, as de Händler Demaratos wörkli glebt gha het, aber s werd bizwiiflet, as er au de Vatter vom römische König gsii sai.