D Frösch (altgriechisch Βάτραχοι Bátrachoi) isch en antiki griechischi Komödie vom Aristofanes. Si isch woorschinlig 405 v. d. Z. urufgfüert worde und het dr erst Briis bi de Lenää überchoo.
Dr Dionysos goot in d Underwält aabe, zum dr Euripides wider ins Lääbe zruggzfüere. Dört wird er zum Schiidsrichder im ene Wettkampf zwüschen em Euripides und em Aischylos. Am Schluss mischt sich dr Pluton ii und dr Aischylos wird zum Siiger erkläärt und cha us dr Unterwält wider zrugg in s Lääbe.
Dr Naame vom Stück chunnt vo de Frösch, wo im Dionysos mit iirem «Brekekekèx-koàx-koáx» (Griechisch: Βρεκεκεκὲξ κοὰξ κοάξ) uf d Närve gönge, won er über e See (woorschinlig über e Acheron) gruederet wird zum zum Iigang vo dr Underwält z choo. Dr Dionysos, wo as verwiichligte Feigling daargstellt isch, foot mit de Frösch afo disputiere (Agon).