Farhud

Massengrab von Farhud-Opfer, 1941

Farhud (arabisch الفرهود‎, DMG al-Farhūd) bezäichnet dr Pogrom oder die «gwaltdäätigi Entäignig» gege die jüüdischi Bevölkerig vo Bagdad im Irak. Er het vom 1. bis 2. Juni 1941 stattgfunde, gli noch em Siig vo de Brite über s pro-Nazi Reschiim vom Rashid Ali. Im Machtwakuum, wo entstande isch, het dr Pööbel, understützt vo dr irakische Bolizei, Juude aagriffe und 175 von ene si umbrocht und öbbe duusig verletzt worde. Jüüdischs Äigedum isch blünderet und 900 Hüüser vo Juude si zerstöört worde.^[1] D Brite häi schliesslig für Rue chönne sorge und häi drbii 300 bis 400 Araber verschosse. Wie bim Pogrom z Hebron 1929 häi au z Bagdad e Däil vo de Muslim brobiert iiri jüüdische Noochbere z beschütze.^[2]

Litratuur

• Daphne Tsimhoni: Farhud, in: Dan Diner (Hrsg.): Enzyklopädie jüdischer Geschichte und Kultur (EJGK). Band 2, Metzler, Stuttgart/Weimar 2012, S. 324–327

Fuessnoote

1. Martin Gilbert. The atlas of Jewish history, William Morrow and Company, 1993. pg. 114. ISBN 0-688-12264-7.
2. Mordechai Ben-Porat, "Interview," in T. Morad, D. Shasha, Iraq's Last Jews, Palgrave Macmillan US 2008, 134-5