Felix II. (Papst)

Dr Felix II. († 1. Merz 492) isch vu 483 bis zue sym Dod Papscht gsii. Sy Name isch latynisch un maint „dr Glickli“.

In ere andere Zellig wird er as Felix III. gfiert, wel s vu 355 bis 358 e Papscht Felix II. gee het, wu zum Dail Gegepapscht, zum Dail as rächtmäßige Papscht aagluegt wird. Mänkmol wird er wäge däm au Felix III. (II.) bzw. Felix II. (III.) gnännt, je nodäm, eb s Pontifikat vum Gegepapscht Felix II. as rächtmäßig oder uurechtmäßig gwäret wird.

Lääbe

Dr Felix isch us ere remische Senatorefamilie chuu un Suhn vun eme Prieschter gsii. Är isch ghyrote gsii, wun er in Prieschterstand yydrätten isch. Um des Zyt isch er scho Vater vun e baar Chinder gsii. As Diakon isch dr Felix am 13. Merz 483 mit dr Zuestimmig vum Chenig Odoaker zum Papscht gwehlt wore.

In ere Zyt vum Stryt zwische Nestorianer, Chalcedonier (Orthodoxe) un Monophysite het dr Akakios, dr Patriarch vu Konstantinopel, anne 482 s Henotikon verfasst ghaa. Indäm dr remisch Bischof 484 dr Chilchebann iber d Aahänger vum Henotikon verhängt het, het er mit em akakianische Schisma s erscht Schisma zwische Rom un Konstantinopel firigruefe, wu bis anne 519 gangen isch. Är isch fir d Unabhängigkait vu dr Chilche gegeniber em Chaiser yydrätte, was au ganz praktikalbel gsii isch, wel dodmol Italie em Zuegriff vu Oschtrom dur di germanisch Herrschaft entzoge gsii isch.

Dr Felix isch am 1. Merz 492 gstorbe un isch in dr Chilche San Paolo fuori le mura vergrabe wore. Sy Mahndag isch dr 1. Merz.

Literatur

Friedrich Wilhelm Bautz: Felix II.. In: Biographisch-Bibliographisches Kirchenlexikon (BBKL). Band 2, Hamm 1990, ISBN 3-88309-032-8, Sp. 10.
Adolf Jülicher: Felix 20. In: Paulys Realencyclopädie der classischen Altertumswissenschaft (RE). Band VI,2, Stuttgart 1909, Sp. 2169.
Ambrose Coleman: Pope St. Felix III. In: Catholic Encyclopedia, Robert Appleton Company, New York 1913 (änglisch), Band 6

Weblink

Commons: Felix II. – Sammlig vo Multimediadateie

Felix III. (II.) im Ökumenische Heiligenlexikon

Vorgänger	Amt	Nachfolger
Simplicius	Papscht 483–492	Gelasius I.

Dä Artikel basiert uff ere fräie Übersetzig vu dere Version vum Artikel „Felix_II._(Papst)“ vu de dütsche Wikipedia. E Liste vu de Autore un Versione isch do z finde.