Frida Kahlo

D Frida Kahlo (1932)

D Frida Kahlo de Rivera (uf d Wält choo als Magdalena Carmen Frieda Kahlo y Calderón; * 6. Juli 1907 z Coyoacán in Mexiko; † 13. Juli 1954)[1] isch e mexikanischi Moolere gsi,[2] wo die bekanntiste Wärk von ere iiri Sälbstbordret si.[3]

Dr Kahlo iir Lääbe het in dr Stadt Mexiko aagfange und isch dört au z Änd gange, in iirem Häim wo as s Blaue Huus bekannt isch. Si sälber het gsäit, ass si am 7. Juli 1910 uf d Wält choo sig, aber uf iirer Geburtsurkunde stoot 6. Juli 1907. Es wird gsäit ass d Kahlo häig welle, ass iir Geburtsjoor s gliiche sig wie s Joor vom Aafang vo dr Mexikanische Revoluzioon, so dass iir Lääbe mit dr Geburt vom modärne Mexiko wurd aafoo.

Z Mexiko wird iir Wärk ass sinnbildlig für die nazionale Dradizioone gfiirt und vo de Feministe für iiri kompromissloosi Daarstellig vo dr wiiblige Form and em Erlääbe vo dr Frau.[4] Die mexikanischi und vor allem die indianischi Kultuur si dief in iirem Wärk iibunde, wo mänggisch as Naivi Kunst oder Volkskunst iigstueft wird..[5] Mä het s au as surrealistisch bezäichnet, und 1938 het dr André Breton, dr füerend Chopf vo dr surrealistische Beweegig, d Kunst vo dr Kahlo as e "Band um e Bombe" beschriibe.[4]

D Kahlo isch mit em bekannti Mexikanische Künstler Diego Rivera verhürootet gsi. Iir ganzes Lääbe lang isch si chränklig gsi und e Hufe vo iire gsundhäitlige Brobleem si vom ene Vercheersunglück cho, wo si as Teeneidscher erläbt het. Wääred si sich vo dene Verletzige erhoolt het, isch si vil ellei gsi, und die Isolazioon het iir Wärk, wo vili drvoo Sälbstbordret gsi si, dief beiiflusst. D Kahlo sälber het gsäit, ass si sich vil sälber wurd moole, wil si vilmol elläi sig und wil si s Süsche sig, wo si am beste wurd kenne.[6]

Eis vo iirne Wärch isch im National Museum of Women in the Arts z Washington z gseh.

Fuessnoote

[ändere | Quälltäxt bearbeite]
  1. ↑ Hayden Herrera: A Biography of Frida Kahlo. New York: HarperCollins 1983, ISBN 978-0-06-008589-6
  2. ↑ Frida Kahlo. Smithsonian.com. Abgrüeft am 18. Februar 2008.
  3. ↑ Frida Kahlo by Adam G. Klein
  4. ↑ 4,0 4,1 Norma Broude, Mary D. Garrard. The Expanding discourse: feminism and art history. 1992, page 399
  5. ↑ Ruhrberg Karl, Manfred Schneckenburger; Christiane Fricke; Klaus Honnef: Frida Kahlo: Art of the 20th Century: Painting, Sculpture, New Media, Photography. Köln: Benedikt Taschen Verlag GmbH 2000, ISBN 3-8228-5907-9
  6. ↑ Andrea Kettenmann, Frida Kahlo. Frida Kahlo, 1907–1954: pain and passion page 27
Dä Artikel basiert uff ere fräie Übersetzig vum Artikel „Frida_Kahlo“ vu de änglische Wikipedia. E Liste vu de Autore un Versione isch do z finde.