Dr Georg Bötticher (* 20. Mai 1849 z Jena; † 15. Jänner 1918 z Leipzig) isch e düütsche Grafiker, Schriftsteller und Verleger gsi.
Dr Georg Bötticher isch dr Soon vom Pfaarer Hans Adam Bötticher (1811–1849) und däm synere Frau Clementine Bötticher geb. Hand gsi. Er het d Schuel am Zenker Institut z Jena und am Freimaurerinstitut z Dresden bsuecht. Dänn het er am Dresdner Polytechnikum Muschterzeichner gleert, und drno het er no d Wäberschuel z Chemnitz bsuecht und isch uf Paris as Kunschtgschäft Artur Martin ggange. 1870 het er wägem Chrieg uf Düütschland zrugg müesse.
Won er drufabe z Mühlhausen und dänn z Dresden Muschterzeichner gsi isch, het er agfange schrybe, zerscht für d Zytschrift Deutsche Jugend und als Autoor vom Fachbuech Original-Compositionen zu Flachmustern. D Arbet het en au uf Manne und no an anderi Oort broocht. 1876 het er z Jena d Rosa Marie (Maria) Engelhart ghürootet. Vo syne drüü Chind isch dr Hans (1884–1934) spöter als Schriftsteller und Kabarettischt Joachim Ringelnatz bekant woorde.
I de 1870er Joor het me dr Bötticher au mit syne obersächsiche Mundartwäärch und es paar Bilderbüecher gleert könne. Sit 1897 isch er mit dr Familie z Leipzig gsi, won er sech immer mee ufs Schrybe verläit het. Vo 1901 bis 1918 het er dr Auerbach’s Deutscher Kinder-Kalender usegää und er het für die Fliegenden Blätter gschribe. Vil Erfolg het dr Autoor z Leipzig mit sine satirische Schrifte, Theater und Gedicht gha.
Zum Bötticher syne Fründ het dr Literaturwüssechaftler und sächsisch Mundartdichter Edwin Bormann (1851–1912) ghört.