Gregor VI. (Papst)

dr Papscht Gregor VI., Darstellig in dr Basilika Sankt Paul vor dr Muure

Dr Gregor VI. (uf d Wält chuu as Johannes Gratianus Pierleoni; † wellewäg im Novämber 1047 z Köln) isch Papscht vu 1045 bis 1046 gsii. 1012 het s au ne glychnamige Gegepapscht gee.

Lääbe

Vor sym churze Pontifikat isch dr Gregor VI. syt 1012 Kardinalprieschter un Erzprieschter vu San Giovanni a Porta Latina gsii. Anne 1045 het er vum Papscht Benedikt IX., wun ere Getti vun eme gsii isch, s päpschtlig Amt fir 1000 Pfund Silber gchauft, drotz ass er sälber e Gegner vun ere sonige Simony gsii isch. Am 1. Mai 1045 isch er in s Papschtamt gwehlt wore. Speter hän aber dr Gregor un au dr Benedikt sälber an ihrem Aaspruch feschtghalte, dr rächtmäßig Papscht z syy. Wel s um des Zyt au no dr Silvester III. zum Papscht ghobe woren isch, hän jetzt z Rom sogar drei Päpscht glychzytig regiert.

Di maischte Chilchemanne hän zum Gregor ghalte, wu dr Missständ vu dr Chilche ne Änd het welle mache. Dr dytsch Chenig Heinrich III. het aber am 20. Dezämber 1046 d Synod vu Sutri yygruefe, wu alli drei Päpscht fir uurächtmäßig verchindet het, un statt däm am 24. Dezämber z Rom dr Bischof Suidger vu Bamberg as Clemens II. zum Papscht ghobe het.

Dr Gregor isch uf Köln verbannt wore, wu ne junge Mench nim Name Hildebrand mit em gange isch, dr speter Papscht Gregor VII. Dr Gregor VI. isch vermuetlig im Novämber 1047 z Köln gstorbe.

Literatur

Friedrich Wilhelm Bautz: GREGOR VI. In: Biographisch-Bibliographisches Kirchenlexikon (BBKL). Band 2, Hamm 1990, ISBN 3-88309-032-8, Sp. 309–310.

Weblink

Commons: Gregor VI. – Sammlig vo Multimediadateie

Vorgänger	Amt	Nachfolger
Benedikt IX.	Papscht 1045–1046	Clemens II.

Dä Artikel basiert uff ere fräie Übersetzig vu dere Version vum Artikel „Gregor_VI._(Papst)“ vu de dütsche Wikipedia. E Liste vu de Autore un Versione isch do z finde.