Grossbritannien (Insel)

Root: wo d Insle Grossbritannie isch

Grossbritannie isch e Insle uf dr Nordweschtsyte vo Öiropa.

Geografy

D Insle lyt im Atlantik und isch nume wenig vom öiropäische Feschtland wägg; drzwüsche lyt dr Ermelkanal. Si het d Flechi vo 219.331 Kwadratkilometer, und es isch bi wytem die gröschti Insle vom Kontinänt und die nüüntgrööschti vo dr ganze Wält.

Grossbritannie isch s Hauptland vo dr grosse Inslegruppe vo de Britische Insle. Zu dere ghören au no Irland, d Isle of Man, d Hebryyde, d Shetland-Insle, d Orkneys und vil anderi chlyneri Insle. Die normannische Kanalinsle nooch vor dr französische Küschte, uf dr Südsyte vom Ermelkanal, ghöre geografisch nid zu de Britische Insle, sondern zu Frankrych, sind aber politisch e Deil vom «Vereinigte Königrych».

dr Name

Dr geografisch Name «Britannia» chunt vo de Röömer, wäge de alte Ywooner, de «Britanni». Anne 43 isch e grosse Deil vo dr Insle die römischi Provinz Britannia woorde.

Im Middelalter het men afo zwüsche Grossbritannie und Chlybritannie underscheide. S chlyne Britannie isch s Land südweschtlech vom Ermelkanal, die hütigi französischi Region Bretagne.

Politik

Der politisch Ländername «Grossbritannie» isch im 17. Joorhundert uufcho, wome d Königrych vo Ängland und vo Schottland zämegleit het.

Hüt bilde die drü Länder uf dr Insle Grossbritannie – Ängland, Schottland und Wales – zäme mit Nordirland s Vereinigte Königrych Grossbritannie und Nordirland. Däm syni Regierig isch z London, und s formelle Oberhaupt vonnem isch dr britisch Monarch, sid anne 2022 isch das dr König Charles III..

Weblink