E Hoplit (altgriech. ὁπλίτης, hoplítēs vo ὅπλον, hóplon "Chriegsgräät, schweeri Waffe, schweeri Rüstig, Schweerbewaffneti")[1] isch e Soldaat in dr Hauptdrubbe vo de griechische Armeä in dr archaische und klassische Zit gsi. Usser de schweerbewaffnete Hoplite häi au die liichtbewaffnete Gymnete, d Schlöiderer, wo as Plänkler iigsetzt worde si, d Boogeschütze, d Peltaste, wo mä mit liichtbewaffnete modärne Jeeger cha vergliiche, und d Riter (Hippeis) mindestens sit em Übergang vom 5. zum 4. Joorhundert v. d. Z. e bedütendi Rolle gspiilt.
E Hoplit het, wenn er s sich het chönne läiste, e Helm, e Brustpanzer und Bäischiine us Bronse aaghaa. Sis Schild isch us Holz und rund gsi, mit eme Durchmässer vom ene Meter und isch spööter mit Blääch us Bronse überzooge worde. Dr Hoplit het e Doru (Spiess) mit em Spitz us Stahl ghaa und e Schwärt für e Fall, wo dr Spiess verbroche isch. In dr Zit vo de Perserchrieg si d Spiess öbbe 2 Meter lang gsi, in dr hellenistische Zit bis zu 6 Meter und häi denn Sarissa ghäisse. D Schwärter si zerst churz und graad gsi, vom 4. Joorhundert aa het mä au schweeri Schwärter zum Haue brucht (κοπίς kopís, au μάχαιρα máchaira). Drzue het e Hoplit mänggisch non e Wurfspiess bi sich gha.
D Hoplite häi in ere gschlossene Formazioon kämpft, dr Falanx. Wenn äi Site in d Flucht gschlaage worde isch, häi e Hufe vo de Kämpfer iiri schwere Schilder furtgheit, und d Schlacht isch entschiide gsi. Ooni Schilder häi si sich nid nöi chönne formiere und witerkämpfe. D Schlachte si wäge däm verbisse gsi, aber worschinlig au chürzer und mäistens äidütig entschiide worde. Wie lang e Schlacht mit Hoplite duurt het, isch nit sicher bekannt. Antiki Kwelle reede vilmol von ere lange Zit, aber sicher chürzer as e Daag.
Dä Artikel basiert uff ere fräie Übersetzig vum Artikel „Hoplit“ vu de dütsche Wikipedia. E Liste vu de Autore un Versione isch do z finde. |