Indischer Ozean

Dr Indisch Ozean (churz: Indik, us lat. oceanus indicus) isch mit 74,9 Millione km² Flechi (ca. 14,7 % vu dr Ärdoberflechi) dr drittgrescht Ozean vu dr Ärd. Är gränzt an dr Antarktisch Ozean, dr Afrikanisch, asiatisch un dr australisch Kontinänt un fasst e Volume vu ca. 291,9 Mio km³. Im Gegesatz zum Atlantische un zum Pazifische Ozean, wu zue relativ glyche Aadail uf dr Nord- un au uf dr Sidhalbchugle vu dr Ärd lige, lyt dr grescht Dail vum Indische Ozean uf dr Sidhalbchugle.

Meeresbode

Im Indische Ozean het s uf em Meeresbode e hoche un langgstreckte Mittelozeanisch Rucke, e Huffe nidereri Schwelle, Diefseebeckine, Diefseerinne un verschideni Meerediefine.

Zue dr Mittelozeanische Rucke ghert dr Zentralindisch Rucke, wu sich ugfehr in dr Mitte vu Nord no Sid dur dr Ozean ziet. Zue dr Diefseerinne ghert dr bis 7.455 m dief Sundagrabe, zue dr Meeresdiefine d Diamantinadiefi, wu mit 8.047 m unter em Meeresspiegel di diefscht Stell vum Indische Ozean isch.

Näbemeer

Zur dr Näbemeer ghere d Andamanesee, s Arabisch Meer, dr Golf vu Bengale, di Groß Australisch Bucht, dr Golf vu Aden, dr Golf vu Oman, dr Kanal vu Mosambik, dr Persisch Golf, s Rot Meer un d Stroß vu Malakka.

Insle

Im Indische Ozean lige di bolitisch aigeständige Inselstaate Indonesie, Madagaskar un Sri Lanka. Äigeständigi Inselgruppe sin d Komore (mit em franzesische Iberseedepartement Mayotte), d Seychelle, Sansibar (mit dr Insle Pemba) un d Maledive. D Inselgruppe vu dr Maskarene bilde Mauritius mit dr Insle Rodrigues un s franzesisch Iberseedepartement La Réunion.

D Inselgruppe Sokotra ghert zue dr Republik Jemen. S indisch Unionsterritorium Andamane un Nikobare bilde di glychnamige Inselgruppe Andamane un Nikobare. D Inselgruppe Lakkadive un Amindive un d Insle Minicoy bilde zämme s indisch Unionsterritorium Lakshadweep.

Dr Chagos-Archipel mit dr Hauptinsle Diego Garcia isch s letscht britisch Territorium im Indische Ozean. D Insle Phuket ghert zue Thailand.

Zue Auschtralie ghere d Wynächtsinsle, d Kokosinsle, Heard un d McDonaldinsle un d Ashmore- un Cartier-Insle.

Wyteri Insle, wu zem Indische Ozean ghere, sin d Kerguele, wu zue dr Franzesische Sid- un Antarktisbiet zelle.

Hafestedt am Indische Ozean

Chennai (Indie)
Colombo (Sri Lanka)
Dar es Salaam (Tansania)
Durban (Sidafrika)
East London (Sidafrika)
Jakarta (Indonesie)
Karatschi (Pakistan)
Kalkutta (Indie)
Melbourne (Auschtralie)
Mombasa (Kenia)
Mumbai (Indie)
Perth (Auschtralie)
Port Elizabeth (Sidafrika)
Richards Bay (Sidafrika)

Ärdbidem im Indische Ozean

Verheerendi Uuswirkige het e Ärdbidem im Indische Ozean am 26. Dezember 2004 ghaa. S het d Sterki vu 9,2 uf dr Richterskala ghaa. S Epizäntrum isch im Meer in dr Nechi vum Nordspitz vu Sumatra gläge. Dr vum Bidem uusglest risig Tsunami het iber 300.000 Dodesfäll verursacht. In dr Hauptsach sin d Länder Indonesie, Thailand, Indie un Sri Lanka bedroffe gsii. D Wälle sin aber sogar bis Somalia chuu, wu 5.200 km wyt ewäg isch.

Literatur

Peter Lehr: Region Indischer Ozean - Illusion oder Realität? (Dissertation an der Universität Heidelberg 2004).
Der Indische Ozean in historischer Perspektive. In: Stephan Conermann (Hrsg.): Asien und Afrika: Beiträge des Zentrums für Asiatische und Afrikanische Studien (ZAAS) der Christian-Albrechts-Universität zu Kiel. Band 1. EB-Verlag, Hamburg 1998, ISBN 3-930826-44-5 (Beiträge teilweise deutsch und teilweise englisch).
Manfred Leier: Weltatlas der Ozeane. Mit den Tiefenkarten der Weltmeere. Frederking und Thaler, München 2001, ISBN 3-89405-441-7, S. 188–207.

Weblink

Commons: Indischer Ozean – Sammlig vo Multimediadateie

-2276Koordinate: 22° S, 76° O

Dä Artikel basiert uff ere fräie Übersetzig vum Artikel „Indischer_Ozean“ vu de dütsche Wikipedia. E Liste vu de Autore un Versione isch do z finde.