Internationale Wäärigsfond (IWF) International Monetary Fund (IMF) Fonds monétaire international (FMI) | ||
---|---|---|
Logo vom IWF | ||
Organisazionsart | Sonderorganisazion | |
Abchürzig | IWF, IMF, FMI, МВФ (MVF) | |
Läitig | Christine Lagarde | |
Gründet | 1.-22. Juli 1944 entworfe, 27. Dezämber 1945 gründet[1][2] | |
Hauptsitz | Washington, D.C. | |
www.imf.org |
Dr International Wäärigsfond (IWF; änglisch International Monetary Fund, IMF; au bekannt as Wältwäärigsfond) isch e Sonderorganisazion vo de Veräinte Nazione und het si Sitz z Washington, D.C., USA.
Zu sine Ufgoobe ghööre d Förderig vo dr internazionale Zämmenaarbet in dr Wäärigspolitik, d Uswitig vom Wälthandel, d Stabilisierig vo de Wäggselkürs, dr Kreditvergoob, dr Überwachig vo dr Gäldpolitik und technischi Hilf.
Dr IWF isch 1944 zämme mit sinere Schwöschterorganisazion, der Wältbank, as Folg vo dr Komferänz vo Bretton Woods entworfe worde. Bäidi Organisazione wärde dorum as Bretton-Woods-Instituzion bezäichnet.
Dr IWF het zurzit 188 Mitgliedländer, wo s Stimmrächt von ene sich an iirem Kapitalaadäil orientiert. D Mitgliidstaate mit de grösste Stimmaadäil si: USA 16,75 %, Japan 6,23 %, Dütschland 5,81 %, Frankriich 4,29 %, Veräinigts Köönigriich 4,29 % und China 3,81 %. Vo de dütschsproochige Länder häi Luxeburg 0,20 %, Ööstriich 0,87 % und d Schwiiz 1,40 % Stimmenaadäil.[3]
Dr IWF het scho lang e stark neoliberali Posizioon iignoo und Staate, wo finanzielli Understützig brucht häi, zun ere neoliberale Wirtschaftspolitik zwunge. Maassnaame won er mäistens duuregsetzt het, si gsi, dr Fluss vom Kapitaal und vo de Güeter z dereguliere, uf dr nazionaale und au uf dr internazionaale Eebeni, zum eso d Wettbewärbsfäikäit z vergröössere; und d Staatsusgoobe z sänke zum eso Schulde abzbaue. Die Wirtschaftspolitik chunnt jetz aber mee und mee under starki Kritik, au vo Expärte vom IWF sälber. So häi d IWF-Ökonoome Jonathan Ostry, Prakash Loungani und Davide Furceri in iirem Ardikel «Neoliberalism: Oversold» in dr Juni-Usgoob 2016 vo dr IWF-Zitschrift Finance & Development zuegee, ass die früenere Empfäälige vom Fonds wie d Öffnig vo de Kapitalmäärt kuum mee Waggsdum brocht häi, aber e groosse Iifluss uf d Vergröösserig vo dr Ungliichhäit gha häi, was s Wirtschaftswaggsdum brämst häig. Si gseen jetz au d Deregulierig as e Hauptgrund für spekulativi Flüss vo Kapitaal, wo schweeri Finanz- und Bankkriise chönne verursache.[4]
Dä Artikel basiert uff ere fräie Übersetzig vum Artikel „Internationaler_Währungsfonds“ vu de dütsche Wikipedia. E Liste vu de Autore un Versione isch do z finde. |
Koordinate: 38° 53′ 56″ N, 77° 2′ 39″ W