Johannes XIX. (Papst)

Dr Johannes XIX. (vorhär Romanus vu Tusculum; * z Rom; † Oktober 1032 au dert) isch zwische 1024 un 1032 Papscht gsii.

Lääbe

Är isch uf d Wält chuu as Suhn vum Grof un chaiserlige Admiral Gregor vu Tusculum us em Gschlächt vu dr Tuskulaner, wu um die Zyt iber Rom gherrscht ghaa het. Unter sym Brueder, em Papscht Benedikt VIII., isch er mit dr Titel Consul, Dux un Senator wältlige Herrscher z Rom un in dr Campagna gsii.

Dr Romanus isch noch em Dood vu sym Brueder dur Simony (Ämterchauf) un Aadrohe vu Gwalt as zweete vu dr Familie Tusculum Papscht wore un het dr Name Johannes XIX. aagnuu. Wel er zue däm Zytpunkt wie scho sy Brueder no Laie gsii isch, het er entgeg em Kanon alli Weie an aim Dag iberchuu. Dr Johannes het as wältli orientiert, habgierig un wankelmietig gulte. Dr Chronischt Rodulfus Glaber vu Cluny het bhauptet, ass dää sogar d Primaträcht vum Papscht an dr Patriarch vu Konschtantinopel het welle verchaufe un nume mit Miei het chenne het chenne draa ghinderet wäre.

Am 26. Merz 1027 het dr Papscht Johannes dr Konrad II. un däm sy Frau Gisela zum Chaiser un zur Chaiseri gchrent. Är het em Konrad, wun er vun em bolitisch abhängig gsii isch, verschideni Zuegständnis gmacht, unter anderem het er uf Wunsch vum Chaiser di Cluniazensisch Reform in Schutz gnuu.

Fir s Pontifikat vum Johannes XIX. findet mer in dr Literatur unterschidligi Date, dr Aafang un au s Änd vu sällem variiere um e baar Monet. Fir dr Afang findet mer Date zwische Februar un Juli 1024, s Änd soll zwische April 1032 un Jänner 1033 gläge syy.

Literatur

Udo Tavares: Johannes XIX. In: Biographisch-Bibliographisches Kirchenlexikon (BBKL). Band 3, Herzberg 1992, ISBN 3-88309-035-2, Sp. 220–224.

Weblinks

Commons: Joannes XIX. – Sammlig vo Multimediadateie

Vorgänger	Amt	Nachfolger
Benedikt VIII.	Papscht 1024–1032	Benedikt IX.

Dä Artikel basiert uff ere fräie Übersetzig vu dere Version vum Artikel „Johannes_XIX._(Papst)“ vu de dütsche Wikipedia. E Liste vu de Autore un Versione isch do z finde.