John Hawkesworth

Dr John Hawkesworth (* öbbe 1715, † 16. Novämber 1773), isch en änglische Schurnalist und Schriftsteller gsi.

Biografii

Bordret vom Hawkesworth

Dr John Hawkesworth isch z London uf d Wält cho, isch Autodidakt gsi und het am Aafang woorschinlig für en Apfikaat gschaft. 1744 het er dr Samuel Johnson abglööst, wo für s Gentleman's Magazine [ber d Debatte im Parlam'nt brichdet het. Vo 1746 bis 1749 het er Gedicht under em Psöidonüüm Greville für d Zitschrift gschriibe. Zämme mit em Johnson und andere het er d Zitschrift The Adventurer, gründet. Vo de 140 Usgoobe het dr Hawkesworth d Helfti sälber gschriibe.

Wil er en iifrige Verdäidiger vo dr Moralidäät und dr Religion gsi isch, het er vom Thomas Herring, em Erzbischof vo Canterbury, dr Eeredokter überchoo. Vo 1754 bis 1755 het er im Swift sini Wärk uusegee. Er het 1756 im Dryden si Amphitryon für s Drury Lane Theater adaptiert und im Southerne si Oronooko im Joor 1759. Er het 1760 s Libretto für s Oratorium Zimri gschriibe und im Joor druf isch Edgar and Emmeline: a Fairy Tale am Drury Lane ufgfüert worde. 1761 het er s zwäibändige Almoran and Hamet gschriibe.

Dr Hawkesworth het vo dr Admiralidäät dr Ufdraag überchoo, im Cook si Bricht über die ersti Räis in d Südsee uusezgee, und mä säit er häig vom Herusgääber 6000 Pfund drfür überchoo. Kritiker häi das Wärk kritisiert, wil er s mit dr Wooret nid allzu genau gnoo häig. Mä verzelt, ass er wäge deere Kritik früezitig gstorbe sig.

Dr Hawkesworth isch am 16. Novämber 1773 gstorbe und z Bromley in Kent begraabe worde.

Dä Artikel basiert uff ere fräie Übersetzig vum Artikel „John_Hawkesworth“ vu de änglische Wikipedia. E Liste vu de Autore un Versione isch do z finde.