D Katja Riemann isch d Dochter vun eme Lehrerehbaar un het zwai Gschwischtrig: ihre Brueder Jochen, e Sport- un Chunschtlehrer am Wiedtal-Gymnasium Neustadt bi Wied, Musiker un Autor, un ihri Schweschter Susanne, Chunschtlehreri an dr Humboldtschuel Hannober un Illuschtratori vu Chinderbiecher. Si isch z ‚Karkweyh bi Bremen ufgweachse un het di erschte zweazg Jorh vu ihrem Läbe z Norddytschland verbrocht.
Noch em Abitur an dr Kooperative Gsamtschuel (KGS) Leeste anne 1983 het si z Hamborch e Semeschter Tanzpedagogik studiert, derno isch si vu 1984 bis 1986 uf d Hochschuel fir Musik un Theater Hannover gange un vu 1986 bis 1987 uf d Otto-Falckenberg-Schuel z Minga. In ihrem dritte Semschter z Hannober het si ihri erscht Filmroll iberchuu. Si het am Weschtfälische Landestheater z Castrop-Rauxel hoschpitiert un isch no vor em Änd vu ihre Uusbildig zum Ensemble vu dr Minchner Chammerspiil chuu.
Vu 1990 bis 1998 het d Riemann mit em Peter Sattmann zämmegläbt, wu si bi dr Drillarbete zum Färnsehfilm Von Gewalt keine Rede chänneglehrt ghaa het un wu si insgsamt nyyn Färnseh- un Kinofilm mit em drillt het.[1] Im Augschte 1993 isch ihri gmainsam Dochter Paula Riemann uf d Wält chuu. Syt 2007 isch d Katja Riemann mit em Bildhauer Raphael Alexander Beil liiert.[2]
Zwische 1987 un 1989 het d Riemann an dr Minchner Chammerspiil unter anderem di Blind in Besucher vum Botho Strauß gspiilt, d Ismene in Phaedra vum Jean Racine un s Galy Gays Frau in Mann ist Mann vum Bertolt Brecht. Zwische 1990 un 1992 het si ne Engaschment am Schillertheater z Berlin ghaa mit Rolle in Die Räuber (Reschii: Alexander Lang), Die Ratten un in Weekend im Paradies. Aafangs 2007 het si im Maxim-Gorki-Theater z Berlin im Stuck Sex Stadt Beziehungen d Hauptroll gspiilt. Reschii het d Amina Gusner gfiert. Vu Novämber 2007 bis Februar 2008 het si d Hauptroll im Stuck Anna Karenina (noch em Lew Nikolajewitsch Tolstoi), wu si dur Dytschland un d Schwyz dermit uf Tournee gangen isch. Anne 2008 het si näb dr Jasmin Tabatabai un dr Nicolette Krebitz d Roll vu dr Olga im Stück Drei Schwestern (noch em Anton Pawlowitsch Tschechow) gspiilt
D Katja Riemann het e baar Musikalbe uusebrocht. Scho 1997 isch si uf em Soundtrack vum Film Bandits z here gsii. Anne 2000 isch ihre Solo-Debüt Nachtblende, e Pop-Album mit dytsche Text erschine, wu fascht alli vu ihre sälber gschribe wore sin. Anne 2003 isch s änglischsprochig Jazz-Album Favourites mit em Katja Riemann Oktett chuu un 2004 Ein Stück vom Himmel mit Lieder vu jidische Komponischte us dr 1920er un 1930er Johr, zämme mit dr Anika Mauer, dr Natalia Wörner, dr Imogen Kogge, em Burghart Klaußner un em Max Hopp. Uf däm Album singt si d Lieder Sexappeal, Der Mensch muss eine Heimat haben un Monotonous Nights.
Im Dezämber 2006 het si mit em Johannes Heesters in mehrere Vorstellige as Solischti vum Konzertprogramm Stars go swing vu dr Big-Band The Capital Dance Orchestra im Berliner Admiralspalascht gaschtiert. Bim 31. Evangelische Chilchedag im Juni 2007 isch si bi me Konzert vu dr Musikgruppe Brothers Keepers as Sängeri ufdrätte.[3]
Fir ihri Roll im Film Der Verdingbub (2011, Reschii: Markus Imboden) het d Riemann extra Bärndütsch glehrt. In dr Schwyzer Fassig isch ihri Roll aber mit dr Stimm vu dr Esther Gemsch noosynchronisiert wore.
2005: Fay Weldon, Die Teufelin (mit Mechthild Großmann), Patmos audio, ISBN 978-3-491-91192-5, gekürzt, 4 CDs, 332 Min.
2006: David McKee, Du hast angefangen! Nein, du! ... Geschichten vom Streiten und Vertragen, Sauerländer audio, ISBN 978-3-411-80881-6, ungekürzt, 1 CD, 57 Min.
2007: Kathy Reichs, Knochen zu Asche, Random House Audio Köln, ISBN 978-3-86604-708-2, gekürzt, 6 CDs, 427 Min.
2008: Kathy Reichs, Der Tod kommt wie gerufen, Random House Audio Köln, ISBN 978-3-86604-894-2, gekürzt, 6 CDs, 446 Min.
2011: Dora Heldt, Ausgeliebt, Random House Audio Köln, ISBN 978-3-8371-0885-9, gekürzt, 3 CDs
Dä Artikel basiert uff ere fräie Übersetzig vu dere Version vum Artikel „Katja_Riemann“ vu de dütsche Wikipedia. E Liste vu de Autore un Versione isch do z finde.