Kernkraftwerk Fessenheim


Dialäkt: Mìlhüüserisch
Àtomkràftwark vu Fassena

S Àtomkràftwark vu Fassena ìsch a Àtomkràftwark ìm Frànkrìch gsìì. As steht nava-n-em großa Kànàl vum Elsàss (uf Frànzeesch: „Grand Canal d’Alsace“) und isch àm And s ältschta Àtomkràftwark ìm Frànkrìch, wo noch àktiv gsìì ìsch.

Mìt sina zwei Reàktora hàt s Kràftwark a Leischtung vu 1800 MW produziart, dàs heißt 2,88 % vu dr frànzeescha Produktion.

Dr Präsidant François Hollande hàt scho 2012 gsajt àss s Àtomkràftwark vu Fassena bschlossa kännt wara, àwer s Dàtum vu dam Bschluss ìsch a schwara Frog: üs Sìcherheit wotta's teil boll üsschàlta, àwer fer d Wìrtschàft un d Àrwet wo's brìngt wotta's àndra so làng wia meeglig ìn Àktivität bhàlta.

Ìm Novamber 2018 hàt dr Präsidant Emmanuel Macron verkìndet, àss s Àtomkràftwark vu Fassena ìm Summer 2020 züegmàcht wìrd. Dr erscht Reàktor ìsch àm 22. Hornung 2020 üsgschàlta worra, un dr zweit Reàktor àm 30. Juni 2020.[1]

Gschìcht

[ändere | Quälltäxt bearbeite]
Finànziella Pàrtnerschàft

Ànna 1962 hàt d EdF („Électricité de France“) s erschta Mol d Idee vun'ma Àtomkràftwark z'Fassena vorgschlàga.

Si Bàui ìsch ànna 1970 erlàuibt worra. Ar hàt mehr às 1 Milliarda Euro koschta un ìsch vu drèi finànziella Pàrtner zàhlt worra: „Électricité de France“ (67,5 %), d ditscha Firma „Badewerk“, hüt EnBW (17,5 %) un a Konsortium (CNP) vu drèi schwitzer Firma (NOK, EOS un BKW) (15,0 %).

D Stromproduktion hàt ànna 1977 ààgfànga.

Àlla zeh Johr gìtt's a technicka Besüech vum Kràftwark, wo àlles nohglüegt wìrd, fer d Sìcherheit vu dr Àktivität z'schätza.

Tecknicka Dàta

[ändere | Quälltäxt bearbeite]

S Àtomkràftwark hàt zwei Druckwàsserreàktora, wo jeder a Leischtung vu 880 MW produziara kààt. Sa wara dur dr groß Kànàl vum Elsàss àbkiahlt. Dr Container vun'ma Reàktor ìsch üs Stàhl un wìegt ungfahr 160 Tonna. Ìn so'ma Container sìn 60 Tonna Karnbrennstoff (Uràn). Dr Boda unter'ma Reàktor ìsch 1 Meter dìck.

Stromproduktion vu 1977 bis 2010
D Reàktora
Reàktorblock Fessenheim I Fessenheim II
Reàktortyp Druckwàsserreàktor Druckwàsserreàktor
Bruttoleischtung 920 MW 920 MW
Nettoleischtung 880 MW 880 MW
Verwàlter EDF EDF
Harsteller Framatome Framatome
Ààfàng vum Bàui 01.09.1971 01.02.1972
Stromnetz-Verbìndung 06.04.1977 07.10.1977
Ààfàng vum kommerziella Betrìeb 01.01.1978 01.04.1978
Gsàmta Energie produziart bis 2010 172 390 GWh(e) 177 660 GWh(e)

Làger

[ändere | Quälltäxt bearbeite]
D owerrhinischa Tiafewena

D Gegend vu Fassena lìegt uf dr owerrhinischa Tiafewena, wo bekànnt ìsch fer ìhra Ardbewa-Gfohr. Ànna 1356 hàt a groß Ardbewa d Stàdt Bàsel zersteert. Dàs Bàsler Ardbewa ìsch ewa àls Referanz gnumma worra, fer d Àtomkràft z'Fassena z'bàuia: noh da Sìcherheitsnorma ìsch vorgsah àss s Kràftwark a Ardbewa vu dara Stärka kännt üshàlta.[2]

Dr Kànàl dernawa hìlft ìn dr Àbkiahlung vu da Reàktora. Dur dàs wìrd s Wàsser vum Kànàl a bìtsi wärmer: ungfahr 0,7 °C (durschnìttlig).[3]

Ìn dara Gegend ìsch d „Hàrdt“, a Wàld mìt kìesigem Boda wo fer d Làndwìrtschàft nìt geignet ìsch (üsser fer Spàrgla). Àlso ìsch do a ìnduschtriella Entwìcklung vu da Iwohner zìmlig güet ààgsah gsìì.

Ìm Unterboda vum Elsàss ìsch a sehr großa Wàsserresarva, wo-n-a wìchtiger Zwack fer Umwaltschutz ìsch.

Betrìeb

[ändere | Quälltäxt bearbeite]

Steerunga

[ändere | Quälltäxt bearbeite]
Steerunga ìm Àtomkràftwark vu Fassena

Ànna 2000 ìsch a Problem ìn dr Harstellung vu da Wàsserbehàlter entdeckt worra. Dàs hàt s Kràftwark vu Fassena, un noch àndra ìm Frànkrìch, betroffa. Z'Fassena ìsch d notwandiga Repàràtür ànna 2002 gmàcht worra.

Àm 24. Janner 2004 ìsch a Hàhna züegmàcht worra, wo nìt hatt sotta. Sìewa Àrweiter han sìch um dia Steerung müeßa bekìmmra un han leider a bìtsi radioàktiva Elemanta igschnüüft.

Àm 29. Septamber 2005, wahrend dr Àblàdung vum Reàktor n° I, ìsch a elektrischa Panne vorkumma. Mehrera Àbkiahlung-Pumpa un Kontroll-Àppàrater sìn a Rung ohna Strom un üsser Betrìeb blìewa.

Àm 27. Dezamber 2009 hàt Pflànza-Drack dr Wàsser-Igàng verstupft. Dr Wàsserstrom vum Àbkiahlungsystem ìsch schwächer worra. Dr Reàktor n° II, wo sallamols gràd àm Ààmàcha gsìì ìsch, ìsch wagadam a bìtsi länger üsgschàlta blìewa.[4]

Àm 25.Àwrìl 2012, hàt's ìn dr Àgkiahlungsànlàga vu'ma Wachselstromgeneràtor fànga-n-à brenna, ìm Teil wo kè Ràdioàktivität ìsch. Ebbena drissig Pumpié un zwei Schàndàrma-Mànnschàfta sìn kumma fer sìch um da Unfàll z'bekìmmra. 's hàt kè Schàda gaa.[5]

Àm 8. Mai 2012 hàt dr Reàktor n° II automàtisch üsgschàlta, wahrend ema regelmaßiga Tescht wo s Àtomfràftwark vum Stromnetz trennt müeß wara.[6]

Àm 5. septamber 2012 ìsch heißer Wàsserstoffperoxid-Dàmpf üssapfüüst un hàt zwei Àrweiter liicht verbrennt. 's hàt a Bràndalarm gaa, obwohl àss kè Fiir gsìì ìsch.[7]

Àm 9. Àwrìl 2014 ìsch e sekundär Kìehl-Circuit vum Reaktr 1 waga`m Bouchon üss Roscht ìwwrgläufa un e pààr Trepfla hàn `s ein vun de zwei Reaktrschutzsyschteem kàpütt gmàcht, so hàn se müen üsschàlta.[8][9] Zwìscha da 18. un 19. Àwrìl 2014, hàt d Stromproduktion gànz ghàlta: dr Reàktor n° I ìsch momentàn üsser Betrìeb zitterm 9. Àwrìl gsìì, un dr Reàktor n° II hàt àm Frittig z'Owa àm 18. Àwrìl dur a Sìcherheitsprozess automàtisch üsgschàlta.[10][11] Fàscht zwei Johr speter, àm 4. März 2016, ìsch bekànnt wora, dàss die Sterung ditlig schwarer gsìì ìsch. S automatisch Üsschàlta hàt nìt funktioniert ghà, waga dam hàn d Brannstab mìt Bor miaßa gflutet wara. D Temperatür vum Reàktor sei e Zittlàng uukontrolliert àbgsunka.[12][13]

Frog ìwer d Züekunft vum Kràftwark

[ändere | Quälltäxt bearbeite]

S Àtomkràftwark vu Fasssena ìsch zwàr àlt, àwer 's ìsch güet unterhàlta un wìrklig sìcher, noh dr EDF.[14]

Noh-n-em Ardbewa vu Fukushima, wo-n-a Ìwerschwämmung geursàcht hàt, han Wìssaschàftler schwàrtz gsah fer dr Làger vu Fassena: s Kràftwark kännt a stàrka Ardbewa üshàlta, àwer wia war's mìt em Kànàl? S Kràftwark ìsch teilwiis unter'm Niveau vum Wàsser, àlso wenn dr Dàmm vum Kànàl dat kràcha, noh war a Ìwerschwämmung wia z'Fukushima aui meeglig.[15]

Dr Präsidant Nicolas Sarkozy hàt ìm Àtomkràftwark vu Fassena gànz Vertàuia ghàà un ar ìsch fer a Verlängerung vu sinera Àktivität gsìì. Mìt dara Meinung sìn d Àrweiter un d meischta Iwohner vu dr Gegend zfrìeda gsìì, denn so war d lokàla Wìrtschàft gschìtzt gsìì.[16]

Versàmmlung gega Àtomkràft, vor em Kràftwark vu Fassena

Dergega han sìch àwer mehrera Stìmma fer a Bschluss vum Kràftwark lo heera: Umwaltschìtzer vu da drèi Lander (bsunderscht vu Ditschlànd un vu dr Schwitz), teil Wìssaschàftler, usw. meina àss s Kràftwark züe àlt un gfahrlig worra ìsch. Teil Gwählta han aui a Meinung gega dr Verlängerung vu dr AKW-Àktivität gaa: dr Generàlrot vu Franche-Comté àm 29. Marz 2011[17], dr Gmeinrot vu Stroßburri àm 11. Àvril 2011[18], dr Kommünàlverbànd vu Stroßburri àm 15. Àvril 2011[19], Kàntona ìn dr Schwitz[20], mehrera Gmeina ìn Ditschlànd.

D ASN („Autorité de Sûreté du Nucléaire“) hàt noh-n-em letscha Kontroll d Erlàuibnis gaa fer zeh Johr witterscht z'màcha, àwer mìt einer Bedrangung: dr Boda unter da Reàktora sott verstärkert wara. Ursprunglig ìsch'r numma 1 Meter dìck gsìì, wàs noh da Norma nìt langt. Dia Àrwet, wo unbedingt vor Ands Juni 2013 hàt müeßa gmàcht wara, hàt ungfahr 100 Milliona Euro koschta.[21]

Ìm Mai 2012 ìsch dr Präsidant François Hollande gwählt worra; ar hàt versprocha ghàà àss'r s Àtomkràftwark vu Fassena züe dat màcha. Ìm Septamber 2012 hàt'r àls Bschluss-Dàtum And 2016 ààgaa.[22][23] Ìm Septamber 2015 hàt àwer d Umwaltminischtera Ségolène Royal erkìndigt àss s Àtomkràft vu Fassena erscht noh dr Erräffnung vum züekìnftiga Àtomkràftwark vu Flamanville bschlossa wìrd[24]. Dàs Dàtum ìsch bis jetz unbekànnt, àwer befìndet sìch uf àlla Fall noh 2016.

Noh dr Verstärkerungsàrwet vum Boda, wo ìm Juni 2013 fertig gworra ìsch, hàt d ASN a nèia Erlàuibnis fer 10 Johr Àktivität gaa.[25] Àm 19. Juli hàt àwer d ASN a nèia Prìfung vum Reàktor n° II verlàngt; da Reàktor ìsch ìm Juni 2016 waga-n-era Steerung àn'ma Dàmpfgeneràtor ghàlta worra. Un ìm Oktower 2016 hàt d ASN aui a nèia Prìfung vum Reàktor n° I verlàngt, waga Zwiifel àn dr Stàhlquàlität ìn mehrera Àtomkràftwark ìm Frànkrìch. Dur dàs wara d gsàmta Reàktora vu dam Àtomkràftwark wahrend mehrera Wucha ands 2016 ghàlta[26].

Ìm Novamber 2018 hàt dr Präsidant Emmanuel Macron verkìndet, àss s Àtomkràftwark vu Fassena ìm Summer 2020 züegmàcht wurd.[27]

Externa Lìnks

[ändere | Quälltäxt bearbeite]
 Commons: Àtomkràftwark vu Fassena – Sammlig vo Multimediadateie

Referanz

[ändere | Quälltäxt bearbeite]
  1. ↑ Gschìcht vum Àtomkràftwark vu Fassena, uf „lalsace.fr“ àm 21.02.2020 (fr). Archiviert vom Original am 21. Februar 2020; abgruefen am 21. Februar 2020.
  2. ↑ Wia d frànzeescha Àtomkràft d Ardbewa-Gfohr schätzt, ìn dr Zittung „Le Point“ (fr)
  3. ↑ EDF-Noochrìchta vu Juli-Àuigscht 2011 (de). Archiviert vom Original am 18. Januar 2012; abgruefen am 4. März 2020.
  4. ↑ Verstupfung vum Wàsser-Igàng, 27.12.2009 (fr)
  5. ↑ Dr Brànd vum 25.4.2012, ìn dr Zittung „L'ALSACE“ (fr)
  6. ↑ Automàtischa Üsschàltung wahrend em Tescht vum 8.5.2012, ìn dr „Badische Zeitung“ (de)
  7. ↑ Dr Unfàll vum 5.9.2012, ìn dr Zittung „L'ALSACE“ (de)
  8. ↑ Steerfàll-Meldung durich de frànzeesch Nuklear-Ufsichtsbehörde ASN Archivlink (Memento vom 9. Jänner 2015 im Internet Archive)
  9. ↑ Autorité de Sûreté Nucléaire: Suites de l'inondation interne du 09/04/2014
  10. ↑ AKW Fessenheim heruntergefahren, uf fr-online.fe (de) Archivlink (Memento vom 23. April 2014 im Internet Archive)
  11. ↑ Fessenheim: redémarrage du réacteur, uf lefigaro.fr (fr)
  12. ↑ sueddeutsche.de 4. März 2016: Panne im Atomkraftwerk Fessenheim war gravierender als gedacht
  13. ↑ wdr.de: Französische Atomaufsicht vertuschte schweren Zwischenfall im Atomkraftwerk Fessenheim
  14. ↑ Noochrìchta vu dr EDF ìwer d Sìcherheit vum Àtomkràftwark vu Fassena (de). Archiviert vom Original am 15. April 2012; abgruefen am 4. Oktober 2012.
  15. ↑ Àwerschämmung-Gfohr, uf „LeMoniteur.fr“ (fr) (Memento vom 28. Juli 2011 im Internet Archive)
  16. ↑ D Unterstìtzung vu da Iwohner, uf „FranceSoir.fr“ (fr)
  17. ↑ D Meinung vum Generàlrot vu Franche-Comté (fr)
  18. ↑ D Meinung vum Generàlrot vo Stroßburri (fr) Archivlink (Memento vom 12. April 2011 im Internet Archive)
  19. ↑ D Meinung vum Kommünàlverbànd vu Stroßburri (fr)
  20. ↑ Noch ein Kanton gegen AKW, ìn dr „Badische Zeitung“ vum 13.04.2011 (de)
  21. ↑ Zeh Johr Verlängerung, uf „LeFigaro.fr“ (fr) Archivlink (Memento vom 23. Oktober 2012 im Internet Archive)
  22. ↑ AKW Fessenheim geht Ende 2016 vom Netz, uf „tagesschau.de“ (de)
  23. ↑ Centrale de Fessenheim: fermeture confirmée, uf „france3.fr“ (fr)
  24. ↑ Red vu dr Umwaltminischtera Ségolène Royal ìwer s Àtomkràftwark vu Fassena, àm 08.09.2015, uf L'ALSACE.fr (fr)
  25. ↑ And vu dr Verstärkungsàrwet ìm Juni 2013, uf „actu-environnement.com“ (fr)
  26. ↑ Dr Reàktor n° I wìrd aui boll ghàlta , lalsace.fr. Abgruefen am 19. Oktober 2016. 
  27. ↑ Fessenheim: Emmanuel Macron confirme la fermeture de la centrale nucléaire pour l'été 2020, France Bleu, 27. Novamber 2018

Koordinate: 47° 54′ 13″ N, 7° 33′ 45″ O