La Resurrezione (it. d Uferstejig) (HWV 47) isch en Oratorium vom Georg Friedrich Händel, au wenn s ere Opere äigentlig äänliger isch as eme Oratorium.
Dr Händel het s „Oratorio per la resurrettione di Nostro Signor Giesù Cristo“ (Oratorium über d Uferstejig vo unserem Heer Jesus Christus) im Joor 1708 z Rom gschriibe, und es isch dört im Palazzo Bonelli vom Marchese Ruspoli am Ostersunndig, 8. April, under dr Läitig vom Arcangelo Corelli urufgfüert worde. Bi deere Uffüerig isch e Frau drbii gsi, d Sängere Margherita Durastante. Im Babst Clemens XI. het das nid gfalle und si isch in de neggste Uffüerige mit em Kastrat Filippo ersetzt worde.
S Libretto isch vom Carlo Sigismondo Capece, und het fümf Rolle gha: Angelo (Engel, Sopran) und Luzifer (Bass), wo über d Bedütig vom Dood und dr Uferstejig vom Christus diskutiere, und drei Mensche, wo um dr Jesus druure: d Maria Magdalena (Sopran), d Maria vom Kleofas (Alt) und dr Jünger Johannes (Tenor).