Makedonische Dynastie

Die Byzantinische Themeverwaldig uf em Balkan um 1045

Die makedonischi Dünastii isch d Familie vo de byzantinische Kaiser vom Basileios I. Makedon (867–886) bis zu dr Theodora III. († 1056). Dr Naame vo dr Dünastii isch e geographischi und nit en ethnischi Bezäichnig gsi.

Dr Stammvater Basileios I. het zun ere armenisch-griechische Familie ghöört, wo sich im byzantinische Thema Makedonie niidergloo het. As Chind het er e Zitlang z Bulgarie gläbt mit sinere Familie, wo sit 813 Gefangeni vom bulgarische Khan Krum gsi si. Dr Basileios het chönne flüchte, isch Stallchnächt bim ene Verwandte vom Bardas, em Unggle vom Kaiser Michael III. worde, und isch denn as Verdraute vom Kaiser zur Macht ufgstiige. 867 het er dr Michael ermordet und isch sälber Kaiser worde.

D Familie isch im Joor 1056 mit dr Kaiserin Theodora III. usgstorbe. Si het churz vor iirem Dood dr Michael VI., wo nid zur Familie ghöört het, zum Noochfolger bestimmt. Dä isch aber scho e Joor spööter vom Adel under em Isaak Komnenos verdrängt worde.

Kulturell het s Riich under de makedonische Kaiser e nöiji kulturelli Blüetefaase erläbt, die sogenannti makedonischi Rönessans.

Byzantinischi Kaiser us dr makedonische Dünastii

• Basileios I. Makedon (867–886)
• Leo VI. (886–912)
• Alexander (912–913)
• Konstantin VII. Porphyrogennetos (913–959)
• Romanos I. Lakapenos (920–944)
• Romanos II. (959–963)
• Nikephoros II. Phokas (963–969)
• Johannes I. Tzimiskes (969–976)
• Basileios II. Bulgaroktonos (976–1025)
• Konstantin VIII. (1025–1028)
• Romanos III. Argyros (1028–1034)
• Michael IV. (1034–1041)
• Michael V. (1041–1042)
• Zoë und Theodora III. (1042)
• Konstantin IX. Monomachos (1042–1055)
  • Georg Maniakes (1042–1043), Geegekaiser
• Theodora III. (1055–1056), 2. Regierigszit
• Michael VI. (1056–1057)

Familieverheltnis

1. Basileios I. Makedon (813–886)
   1. Konstantin (865–878)
   2. Leo VI. dr Wiisi (866–912)
      1. Eudokia († 892)
      2. Anna ∞ Ludwig dr Blind
      3. Basileios († 900)
      4. Konstantin VII. Porphyrogennetos (905–959) ∞ 919 Helene († 961), Dochder vom Romanos I. Lakapenos
         1. Romanos II. (940–963) ∞ 1) 942 Berta, Dochder vom König Hugo vo Italie, ∞ 2) 957 Anastasia, Theophano gnennt
            1. Basileios II. Bulgaroktonos (957–1025)
            2. Konstantin VIII. (961–1028)
               1. Eudokia, Nonne
               2. Zoë (980–1050) ∞ 1) 1028 Romanos III. Argyros (um 968–1034), ∞ 2) 1034 Michael IV. († 1041), ∞ 3) 1042 Konstantin IX. Monomachos († 1055)
               3. Theodora III. († 1056)
            3. Anna (963–1011) ∞ 989 Wladimir I. Groossfürst vo Kiew († 1015)
         2. Agathe
         3. Maria (Irene) ∞ 927 Peter Zar vo de Bulgare († 970)
         4. Theodora ∞ 971 Johannes I. Tzimiskes († 976)
   3. Alexander († 913)
   4. Stephanos I. (870–893), Patriarch vo Konstantinopel 886

Dä Artikel basiert uff ere fräie Übersetzig vum Artikel „Makedonische_Dynastie“ vu de dütsche Wikipedia. E Liste vu de Autore un Versione isch do z finde.