Muskel

Die drei Arte vo Muskelgwääb: (a) Skelettmuskel, (b) glatte Muskel, und (c) Härzmuskel. (gliichi Vergröösserig)

Muskle si wäichs Gwääb, wo s in de mäiste Dier git. Allne Muskle vom ene Körper oder eme Körperdäil zämme säit mä Muskulatur. D Muskelzälle bestöön us Proteinfaasere us Aktin und Myosin, wo anenander chönne verbiirutsche. E Kontrakzioon wird dur e Närvenimpuls usglööst. Drbii schiebe sich d Protein inenander, so dass d Zälle chürzer wird. Wenn d Närve ufhööre, dr Muskel mit Impuls z versorge, hört d Kontrakzioon uf und dr Muskel wird däig. Mä reedet denn vo Muskelrelaxazioon. D Muskle broduziere Chraft und Beweegig. Vor allem si si verantwortlig für d Körperhaltig, d Fortbeweegig und d Beweegige vo de innere Organ, wie s Chlopfe vom Härz, wo s Bluet dur e Körper bumpt oder d Peristalsis vom Darm, wo d Naarig dur s Verdaujigssüsteem dransbordiert.

Dr schematisch Ufbau vom ene Skelettmuskel

D Muskelzälle entwiggle sich im Embryo us em Mesoderm im ene Brozäss, wo Myogenese häisst. Es git drei Arte vo Muskle: gsträifleti Skelettmuskle, dr Härzmuskel und glatti Muskle wie die vom Darm. Es git Muskle wie die in de Erm und Bäi, wo willkürlig, das häisst bewusst, chönne enerwiert wärde, und anderi Muskle, wo unwillkürligi Körperfunkzioone häi und vom wegetative Närvesüsteem gstüürt wärde, wie s Härz oder dr Darm.

D Muskle bechömme d Energii zum Funkzioniere vor allem vom Oxidiere vo Fett und vo Choolehüdrat, aber anerobischi chemischi Brozäss chömmen au vor, vor allem bi schnälle Skelettmuskle. Chemischi Reakzioone broduziere Adenosin Triphosphat (ATP) Molekül, wo mit ene s Myosin bewegt wird.

S Wort Muskel isch vom latiinische musculus abgläitet, wo «Müüsli» bedütet, villicht wil wenn sich gwüssi Muskle zämmezien es e chli usgseet, wie wenn e Muus sich under dr Hut wurd beweege.

Litratuur

[ändere | Quälltäxt bearbeite]
  • Schmidt, Unsicher (Hrsg.): Lehrbuch Vorklinik – Teil B, Deutscher Ärzte-Verlag Köln, 2003, ISBN 3-7691-0442-0
  • Detlev Drenckhahn (Hrsg.): Anatomie Band 1. Urban & Fisher, Münche 2008

Weblingg

[ändere | Quälltäxt bearbeite]
 Commons: Muskle – Album mit Multimediadateie
Dä Artikel basiert uff ere fräie Übersetzig vum Artikel „Muscle“ vu de änglische Wikipedia. E Liste vu de Autore un Versione isch do z finde.