D Nemetona isch e keltischi Göttin gsii, wo vor alem vo de Treverer und Vangione vereert woren isch. Ere Partner isch de Loucetius gsii.
De Name Nemetona isch Gallisch und isch en Ablaitig vo nemeton »Hailige Hain«, wo au i Ortsnäme vorchunnt, so Nemetacum (hüt: Arras) oder Drynemeton »Heilige Aichehain«, wo de Versammligsort vo de Galater gsii isch. Au de germanischi Stamm vo de Nemeter, wo südlich vo de Vangione glebt het, laitet sin Name vom gallische Wort ab.
Mittem gallische Wort verwandt isch lat. nemus und altsächs. nimidas, wo au d Bidüütig »Hailige Hain« hend. Z Grenoble im Piet vo de Allobroger isch en Inschrift a de Muettergöttine MATRI NEMETIALI gwidmet.[1]
D Nemetona het zäme mit em Loucetius e Tempel z Chlii-Winternheim[2] im Piet vo de Aresaces, emene Tailstamm vo de Treverer, ghaa und en andere Tempel för da Götterpaar isch z Trier, em Hoptort vo de Treverer, gstande.[3] Widmige a d Nemetona stammet aber au us anderne Orte vo de Region.[4] D Inschrift us Bath z England isch vomene Treverer gstiftet wore.[5] Ere Partner, de Loucetius isch mitem römische Chrieggott Mars gliichgsetzt wore, si selber mit de römische Siiggöttin Victoria.