Rishi Sunak

dr Rishi Sunak (2020)

Dr Rishi Sunak (* 12. Mai 1980 z Southampton) isch e britische Bolitiker (Conservative Party). Är isch syt dr Unterhuuswahl 2015 Mitglid im House of Commons fir dr Wahlkrais Richmond (Yorkshire). Vum 13. Februar 2020[1] bis zue sym Ruggdritt am 1. Juli 2022[2] isch er britische Finanzminischter gsii. Syt em 24. Oktober 2022 isch er Barteifierer vu dr Konservative Bartei un syt em 25. Oktober dr Premierminischter vum Verainigde Chenigryych.[3]

Familie un Beruef

[ändere | Quälltäxt bearbeite]

Dr Rishi Sunak isch anne 1980 as eltschts vu drei Gschwischtrig z Ängland uf d Wält chuu. Sy Vater Yashvir chuunt vu Kenia un sy Mueter Usha vu Tansania. Boodi Familie stammen us em indische Punjab un sin in dr 1960er-Johr vu Oschtafrika uf Southampton emigigriert.[4] Sy Vater isch Dokter (general practitioner) bim National Health Service gsii, sy Mueter Usha Apedekeri. Dr Rishi Sunak isch Hindu.[5] Är isch in dr änglisch Chlaistadt Romsey (Hampshire) ufgwagse, wun er au uf d Grundschuel gangen isch. No sym Abschluss am Eliteinternat Winchester College het er am Lincoln College z Oxford Filosofy, Bolitik un Wirtschaft studiert un mit eme Bachelor abgschlosse. Derno het er unter anderem as Analischt fir Goldman Sachs[6] un as Hedgefonds-Manager gschafft. An dr Stanford Graduate School of Business het er anne 2006 en Abschluss as Master of Business Administration gmacht.

Dr Sunak isch syt Augschte 2009 ghyrote mit dr Akshata Murthy, dr Dochter vum N. R. Narayana Murthy, em Mitgrinder vu Infosys, un dr Sudha Murthy. Si hän si bim Studium an dr Stanford University chänneglehrt. D Murthy isch Diräkteri vu dr Investmentfirma vu irem Vater Catamaran Ventures.[7] S Baar het zwoo Dechtere un läbt im Herrehuus Kirby Sigston Manor im Dorf Kirby Sigston in dr Nechi vu Northallerton.[8]

Bolitik

[ändere | Quälltäxt bearbeite]

Bi dr britische Unterhuuswahl am 7. Mai 2015 het dr Sunak im Wahlkrais Richmond (Yorks) kandidiert un mit 51,4 % vu dr Stimme ne Sitz im Unterhuus (House of Commons) gwunne. Bi dr vorzogene Unterhuuswahl am 8. Juni 2017 het er im nämlige Wahlkrais 63,9 %[9] un bi dr Unterhuuswahl am 12. Dezämber 2019 63,6 % vu dr Stimme[10] iberchuu.

Noch em Ruggdritt vum Boris Johnson isch dr Sunak no dr Liz Truss in dr Urwahl unter dr Mitzglider vu dr Konservatitische Bartei mit 42,6 % gege 57,4 % unterläge.[11]

Wu d Liz Truss am 20. Oktober 2022 ire Ruggdritt verchindet het, het dr Sunak am 23. Oktober 2022 gsait, ass er zum Barteivorsitzer un dodermit zum Premierminischter kandidiere duet.[12] Am 24. Oktober isch er vu dr konservative Frakzion zue irem Noofolger as Barteifierer gwehlt[13][14] un am Dag drufabe vum Chenig Charles III. zu Premierminischter vum Verainigte Chenigrych ernännt wore.[15]

[ändere | Quälltäxt bearbeite]
 Commons: Rishi Sunak – Sammlig vo Multimediadateie

Fueßnote

[ändere | Quälltäxt bearbeite]
  1. ↑ Sebastian Borger: Boris Johnson wirft kritische Geister aus seiner Regierung. In: derStandard.de. 13. Februar 2020, abgruefen am 5. August 2022.
  2. ↑ Zwei britische Minister treten zurück – aus Protest gegen Johnson. In: Der Spiegel. 5. Juli 2022, ISSN 2195-1349 (spiegel.de [abgerufen am 5. Juli 2022]).
  3. ↑ Florian Pütz: Großbritannien – Rishi Sunak: Das ist der nächste britische Premierminister. In: Der Spiegel. 24. Oktober 2022, ISSN 2195-1349 (spiegel.de [abgerufen am 24. Oktober 2022]).
  4. ↑ Tatler Archive: Inside the world of Rishi Sunak. Tatler
  5. ↑ Who is the new chancellor Rishi Sunak? BBC News
  6. ↑ B. S. Reporter: Quite positive that Rishi will do well as a MP, says Murthy. In: Business Standard India. 8. Mai 2015 (business-standard.com [abgerufen am 13. Februar 2020]).
  7. ↑ Roy, Amit. Murthy son-in-law gets Hague’s seat , The Telegraph (Indien), 20. Oktober 2014. Abgruefen am 24. März 2020. 
  8. ↑ Chancellor Rishi Sunak has new pool, gym and tennis court approved. In: BBC News. 26. August 2021 (bbc.com [abgerufen am 24. Oktober 2022]).
  9. ↑ 2017 General Election Results: Richmond (Yorks). UK Parliament, abgruefen am 4. September 2022 (änglisch).
  10. ↑ 2019 General Election Results: Richmond (Yorks). UK Parliament, abgruefen am 4. September 2022 (änglisch).
  11. ↑ Namita Singh, Joe Middleton, Andy Gregory, Thomas Kingsley: Liz Truss – live: Foreign secretary to be UK’s new PM as Sunak defeated. In: The Independent. 5. September 2022, abgruefen am 5. September 2022 (änglisch).
  12. ↑ Rishi Sunak takes lead in race to be Tory leader as rivals struggle to gain support. The Guardian, 23. Oktober 2022.
  13. ↑ Rishi Sunak set to be PM as penny Mordaunt drops out of leadership race. Abgruefen am 24. Oktober 2022 (britischs Änglisch).
  14. ↑ Rishi Sunak wins Tory leadership race and will become UK’s prime minister after Penny Mordaunt pulls out, theguardian.com, abgruefen am 24. Oktober 2022.
  15. ↑ Rishi Sunak becomes British prime minister after meeting with King Charles III. Abgruefen am 25. Oktober 2022 (britischs Änglisch).