Riva Valdobbia
Riifu – uf iteliänisch Riva Valdobbia und piemontesisch S’la Riva – isch en Oort und en ehemoligi Gmeind vo der iteliänische Provinz Vercelli.
S Dorf lyt im Tseschrutol a däre Stell, wo der Sytebach Vogna in Fluss Tseschra, wo uf iteliänisch Sesia heisst, ymündet. Äs isch es bar Kilometer unden a Im Land.
Am 22. Juli 2018 hend d Gmeinde vo Riifu und Im Land fusioniert. Die nöie Gmeind heisst Alagna Valsesia.
Das Piet isch im Areal vom Naturpark Parco naturale Alta Valsesia.
D Nochbargmeinde vo Riifu sind Im Land, Alto Sermenza, Campertogno, Greschonei, Mollia und Rassa.
Der Oort chunt s erschte Mol ane 1217 imene Dokumänt vor. S Taal isch im Middelalter vo Walser kolonisiert worde, wo us em Nochbertal vo Greschonei här cho und übere Riifupass ggange sind – der düütsch Naame Riifu chunt us em Walserdüütsch. Im Ortsteil Rabernardo isch s Walsermuseum.
Vo Riifu chunt schynts der berüempt Boumeischter Ulrich Ruffiner.