Sevilla (im madrilenische Spanisch [seˈβiʎa], im andalusische Spanisch [seˈβiʒa]) isch d Hauptstadt vo dr Autonome GmäinschaftAndalusie und vo dr Browinz Sevilla in Spanie. D Stadt het mee as 700'000 Iiwooner und isch die viertgrössti in Spanie. Noch ere spoote Legände isch si vom griechische Helde Herakles gründet worde. D Iiwooner häisse Sevillanos.
D Stadt isch e wichdige Industrii- und Handelsblatz und e Turistezentrum. Sevilla lit uf ere wite und fruchtbare Eebeni uf bäide Site vom Guadalquivir, wo bis doo aane au Seeschiff chönne uf em faare. Es stönde e Hufe Dürm in dr Stadt und si gseet dorum vo alle Site imposant us. Die äigentligi Stadt lit uf em östlige Ufer vom Guadalquivir und um sä ume lige d Vorstedt Los Humeros, Cesteria, Baratillo, Carreteria, Resolana mit em groosse Hospital La Caridad, San Bernardo, San Roque y la Calzada und Macarena mit em Hospital de la Sangre. Vo dr alte Ringmuure, wo emol 66 Dürm ghaa het und rund um die inneri Stadt gange isch, si nume no e baar Überräst vorhande. Am rächte Ufer vom Fluss bräitet sich die groossi Vorstadt Triana us.
Commons: Seville – Sammlig vo Multimediadateie