Tanja Gönner

Dialäkt: Undermarkgreflerisch
d Tanja Gönner 2008 bim Symposium Greening the University z Dibenga

D Tanja Gönner (* 23. Juli 1969 z Semmerenga) isch e dytschi Bolitikeri (CDU). Si isch vu 2004 bis 2005 Sozialminischteri un vu 2005 bis 2011 Umwältminischteri vum Land Baade-Wiirtebäärg gsii, derzue vu 2010 bis 2011 zuesätzli au Verchehrsminischteri.

Syt em 1. Juli 2012 isch si Vorstandssprächeri vu dr Dytsche Gsellschaft fir Internazionali Zämenaarbet.[1][2]

Uusbildig un Beruef

[ändere | Quälltäxt bearbeite]

D Gönner isch mit drei Gschwischtrig, ere eltere Schweschter, ere jingere Schweschter un eme jingere Brueder, z Bingen bi Semmerenga ufgwachse. Si isch z Bingen uf Grundschuel gange un derno z Semmerenga uf d Liebfraue-Schuel, e kadoolischi Maidlischuel, wu si anne 1989 s Abitur gmacht het. No dr Schuel het si Räächtspfläägeri gleert un 1992 mit em Diplom abgschlosse.

Vu 1992 bis 1995 het si in eme Bedriibsberootigsbiroo gschafft mit Schwäärpunkt Insolvänzräächt, ab 1996 het si mit em glyche Schwäärpunkt in ere Räächtsaawaltskanzlei gschafft,.

Dernääbe het si anne 1993 an dr Universiteet Dibenga aafange Räächtswisseschaft studiere. Noch em eerschte juristische Staatsexaame 1997 un eme Referendariat am Landgriicht Raveschburg het si 1999 s zwait Staatsexaame gmacht. Si isch as Aawälti zuegloo woore un het derno vu 1999 bis 2004 as Partneri in ere Aawaltskanzlei as Insolvänzverwalteri gschafft.

D Gönner isch kadoolisch un leedig.

Bolitik

[ändere | Quälltäxt bearbeite]

Bartei

[ändere | Quälltäxt bearbeite]

Anne 1986 isch d Gönner Mitgliid vu dr Junge Union woore im neigrindetet Ortsverband z Bingen. Vu 1987 bis 1992 isch si Gschäftsfiereri vum Kraisverband Semmerenga gsii un ab 1992 drei Joor lang nääbeamtligi Gschäftsfiereri im Bezirksverband Wirttebärg-Hauezollre. Ab 1994 het si drei Joor lang em Landesvorstand z Bade-Wirttebärg aagheert un ab 1996 isch si Byysitzeri im Bundesvorstand gsii. Vu 1998 bis 2002 isch si stellverdrättendi Bundesvorsitzeri vu dr Junge Union gsii.

Anne 1987 isch si in d CDU yydrätte. Si isch zwai Joor lang Mitglid im Vorstand vum Ortsverband z Bingen gsii un vier Joor Prässesprächeri vum Kraisverband Semmerenga. Anne 2001 isch si zur Vorsitzeri vun Kraisverband gweelt woore. Anne 2013 het si nimi kandidiert, ire Noofolger isch dr Klaus Burger wore.

Ab 1994 isch d Gönner Mitglid im CDU-Bundesfachuusschuss Sport gsii, ab 1999 im Bundesfachuusschuss Familie un Juged un ab 2005 in der Kommission „Eltern, Kinder, Beruf“ un em Bundesfachuusschuss Umwält. Vu 2006 bis Ändi 2007 isch si Mitglid vu dr CDU-Grundsatzprogrammkummission gsii. 2007 isch si zur stellverdrättende Vorsitzeri vu dr Kumission Bewahrung der Schöpfung wore.

Im April 2000 isch d Gönner in Bundesvorstand vu dr CDU gweelt wore. Ab 2005 isch si Mitglid vum Landesvorstand vu dr CDU Bade-Wirttebärg gsii.

No dr Landdagswahl 2011, wu dr Minischterbresidänt Stefan Mappus kai Meehait me iberchuu het, het d Gänner as uussichtsrychi Kandidati fir dr Vorsitz vu dr CDU Bade-Wirttebärg gulte,[3] Wu si bi dr Wahl fir dr Fraktionsvorsitz im Landdag geg dr Peter Hauk verlore het, het si iri Kandidatur aber zrugzoge.[4] Au bi dr Wahl zum Vorsitz im CDU-Bezirk Wirttebärg-Hauezollre isch fählgschlaa, am 22. Oktober 2011 het si dert geg dr Thomas Bareiß verlore.[5][6]

Noch em Wächsel zue GIZ im Summer 2012 het si bim Barteidag im Dezämber nimi fir dr CDU-Bundesvorstand kandidiert.

Abgordneti

[ändere | Quälltäxt bearbeite]

Bi dr Bundesdagswahl 2002 het si mit 54,1 % vu dr Erschtstimme s Dirältmandat im Wahlkrais Zollrealb – Semmerenga (Wahlkrais 295) gwunne un isch dodermit in Dytsche Bundesdag gwehlt wore. Wu si zur Minischteri z Bade-Wiirttebärg ernännt woren isch, het si ire Bundesdagsmandat zum 13. Juli 2004 niderglait.

E Mandat im Landdag het si zerscht kais ghaa. Bi dr Landdagswahl im Merz 2011 het si derno s Mandat im Landdagswahlkrais Semmerenga gwunne. Zum 30. Juni 2012 het si s Landdagsmandat niderglait un isch us dr Bolitik uusgschide.

Minischteri

[ändere | Quälltäxt bearbeite]

Am 14. Juli 2004 isch d Tanja Gönner vum bade-wirttebärgische Minischterbresidänt Erwin Teufel as Sozialminischteri in d Landesregierig gruefe wore. Derzue isch si au Behindertebeufdraiti vu dr Landesregierig wore.

E dreiviertel Johr speter, am 27. April 2005, isch si vum neie Minischterbresidänt Günther Oettinger zur Umwältminischteri gmacht wore. Am 23. Februar 2010 het dr Minischterbresidänt Stefan Mappus si zuesätzl au no zur Verchehrsminischteri gruefe un us dr Minischterie fi Umwält un Vechehr ai Minischterium gmacht.[7]

D Gönner isch as Verchehrsminischteri bi dr Schlichtigsgspräch zue Stuttgart 21, wu vum Heiner Geißler moderiert wore sin, aini vu dr sibe Verdrätter*ne gsii, wu fir des Projäkt gsii sin.[8]

No dr Landdagswahl 2011 isch im Mai e Koalition us Griene un dr SPD unter em Minischterbresidänt Winfried Kretschmann bildet wore, dodermit isch d Gönner us em Amt gschide.

Sunschtigs Engaschmänt

[ändere | Quälltäxt bearbeite]
  • Mitglid im Verwaltigsrot vu dr sequa gGmbH as Verdrätteri vu dr GIZ
  • Mitglid im Ufsichtsrot vu dr Dytsche Wälle as Verdrätteri vu dr GIZ
  • Mitglid im Vorstand vu dr Konrad-Adenauer-Stiftig
  • Mitglid im Vorstand vum Wirtschaftsrat der CDU e. V.
  • Mitglid im Byrot vu dr Bundesakademie für Sicherheitspolitik
  • Mitglid in dr Nationalen Plattform „Bildung für Nachhaltige Entwicklung“
  • Mitglid im Rot vu dr Agora-Verkehrswende
  • Mitglid im Rot vum Arnold-Bergsträsser-Institut, Universitet Fryburg
  • Mitglid im Byrot vu dr Landesregierig Bade-Wirttebärg fir Noohaltigi Entwicklig
  • Mitglid im Ufsichtsrot vu dr Deutsche Energie-Agentur GmbH (dena)
  • Mitglid im Ufsichtsrot vu dr Stiftig Liebenau.
  • Mitglid im Verwaltigsrot vu dr Landeskreditbank Baden-Württemberg – Förderbank (bis 2012)
  • Vorsitzeri vum Ufsichtsrot vu dr Flughafe Stuegert GmbH (13. April 2010 bis 12. Oktober 2011)
  • Mitglid im Kuratorium vu dr Stiftig „Im Miteinander für das Alter“
  • Mitglid im Byrot vu dr Junge Philharmonie Oberschwaben e. V.
  • Mitglid im Vorstand vu dr Stiftig vum Wirttebärgische Landessportbund
  • Mitglid im Stiftigsrot vu dr „Sto-Stiftig“
  • Mitglid im Stiftigsrot „Lebendige Stadt“
  • Vorstand vum Verein der Freunde der Erzabtei St. Martin e. V.
  • Vorsitzeri vum TSV Bad Saulgau, Abteilung Volleyball e. V.
  • 2007 fir ai Johr Ökologia - Botschafterin der Ökologie fir di ÖDP-nooch Stiftung für Ökologie und Demokratie

Schrifte

[ändere | Quälltäxt bearbeite]
  • Zieht die größeren Schuhe an! Globale Zukunftsfragen und was Deutschland in der Welt erwartet. Murmann Verlag, Hamburg 2014. ISBN 978-3-86774-341-9
[ändere | Quälltäxt bearbeite]

Fueßnote

[ändere | Quälltäxt bearbeite]
  1. ↑ Michael Hescheler: Tanja Gönner startet als GIZ-Chefin durch. In: Schwäbische Zeitung. 24. Juni 2012.
  2. ↑ Uta Rasche: Nur noch kurz die Welt retten. In: Frankfurter Allgemeine Zeitung, 28. Mai 2013.
  3. ↑ Landtagspräsident Stächele kündigt Rücktritt an. In: Frankfurter Allgemeine Zeitung, 11. Oktober 2011.
  4. ↑ Mann gewinnt Machtkampf. In: die tageszeitung, 29. Merz 2011.
  5. ↑ Karina Christen: Tanja Gönner unterliegt Thomas Bareiß. In: Südkurier. 22. Oktober 2011.
  6. ↑ www.cdu-bw.de (Memento vom 16. März 2016 im Internet Archive)
  7. ↑ Michael Hescheler: „Muss nicht im Rampenlicht stehen“ In: Schwäbische Zeitung, 24. Februar 2010.
  8. ↑ Gabriele Renz: Faktencheck im Rathaus. In: Frankfurter Rundschau, 25. Oktober 2010.