De Theras (altgriech. Θήρας) isch i de griechische Mythologi de Eponym vo de Insle Thera (hütt: Santorini).
De Theras isch de Soo vom thebanische König Autesion und e Noofaar vom Kadmos. Sii Soo isch de Oiolykos. Sini Schwöster Argeia het de Heraklid Aristodemos ghüroote und wo de gstorben isch, isch de Theras de Vormund vo sinene beede Neffe wore und isch för die de Regent vo Sparta gsii. Er söll z Sparta e Hailigtum för d Athena gstiftet haa.
Wo sini Neffe mündig wore sind und as König regiert hend, hett er bischlosse d Insle Thera z bisidle. Er isch mit drai Schiff mit Spartaner und Minyer, wo chorz vorene vo de Insle Lemnos vertribe wore sind und denn uf Lakonie choo sind, loosgseglet. Sii Soo Oiolykos aber hett sich gwaigeret mitzfaare und isch z Sparta blibe. Vom Theras stammed d König vo Thera ab.