Unterreichenbach

Basisdata
Bundesland:	Bade-Wirttebärg
Regierongsbezirk:	Karlsrua
Landkroes:	Calb
Heh:	328 m i. NHN
Fläch:	6,3 km²
Eiwohner:	2449 (31. Dez. 2022)
Bevelkerongsdicht:	389 Eiwohner je km²
Boschtloetzahl:	75399
Vorwahl:	07235
Kfz-Kennzoeche:	CW
Gmoedsschlissel:	08 2 35 073
Adress vo dr; Gmoedsverwaltong:	Im Oberdorf 15; 75399 Unterreichenbach
Webpräsenz:	www.unterreichenbach.de
Schuldes:	Carsten Lachenauer
Lag vo de Gmoed Unterreichenbach em Landkroes Calb
	Karte

Dialäkt: Schwäbisch

Onderreichabach (amtlich Unterreichenbach) isch a Gmaende em Landgraes Calb en Bada-Wirddabärg. Dor Flägga isch vo aldors här wirddabärgisch gwäa, ghaerd abor seid dor Vorwaldongsreform ănna 1974 zom Regirongsbezirk Karlsrua. Ondorreichabach isch deidlich nåch Pforza orientird, wirdschafdlich, vorkehrsmäsich ond vom Aekaofa här. Därzeid (2018) leid d Aewonorzaal bei ogfär 2200.

Geografi

Onderreichabach leid em Nagolddaal zwischa Calb ond Pforza. Ondorhalb isch-s Daal bis en d Gegaward nae no eng ond sombfich. Dor Blazz raechd sdellaweis grad so fir d Eisabãlinie Pforza–Calb ond fir d Bundessdråß B463. D Heng vom Daal send durchwägg bewalded, ovorkennbar isch mor emm Schwaarzwald.

D Gmarkong sezzd sich zsẽma aus 14,1 % Landwirdschaftsfleche, 64,1 % Wald, 18,4 % Sidlongsfleche ond 3,3 % sonsdichor Fleche.

Natur ond Kultur

Dor Nagolddaal-Raadwäag gåd em Bereich vo Ondorreichabach an dor esdliche Daalseid endlang. Dui Sdell vom Daal gild als bsondors schee.

Em Ondorgschoss vo dor Tannbergschule geid-s seid 1999 a Fleesorei-Museom, 2011 vellich nui aegrichded. Em Museom gåd-s om d alda graosa Bedeidong vo dor Fleesorei sbeziäll fir Onderreichabach. D Flees send ibor d Nagold, d Enz, dor Näggor ond dor Rhae bis nåch Holland gflees wårda. S ledsde Floos isch 1911 d Nagold nondor gfara.

Älle drei Jår wird s Daalhubafäsd (Talhubenfest) gfeired, Ende August/Ãfang Säbtembor. Schaofarda uff-ma Originalfloos send dor Hehepunkt. Fir s Rãmaprogramm, Ässa ond Drengga sorged d erdliche Vorae.

D Eisabã-Brugg ibor d Nagold bei Ondorreichabach isch d ledsda exisdirenda so genannda "Schwedler"-Brugg, benannd nåch Johann Wilhelm Schwedler (1823–1894). Där hådd a Konsdrukzio aus Stahl ärfonda, bei där d Sdräba vor dor Brugg blos uff Zug belasded wärded. D Sdabilideed vo därardiche Brugga isch haoch, sbard abor gleichzeidich sogar no Maddrial. S Landesdenkmalamd mechd dui Brugg, dui no aus dor Erbauungszeid sdammd, als technischs Denkmal ärhalda.

Holzbrugg ibor d Nagold, fir dor Raadwäag, bei dor alda Grenz zwischa Bada ond Wirddabärg
Idyllischa Szene an dor Nagold middla en Ondorreichabach
Fleesordenkmal an dor Kreizong B463 / Bãhofsdråß
Schwedler-Brugg ibor d Nagold

Gmaendegliderong

Zo Onderreichabach ghaered Onderreichabach sälbor, seid 1914 dor Flägga Dennjächd ond seid 1972 dor Flägga Kapfahardt.

Aus dor Gschiichd

Onderreichabach wird zom aersda Mål em Jår 1375 ärweend, Kapfahardt dorvår scho 1260. Viile Jårhondord lang isch Ondorreichabach dor ledsde wirddabärgische Flägga em Nagolddaal gwäa. Bis zom Bau vo dor Eisabãsdregge Pforza–Calb em Jår 1868 hådd-s em Daal ondorhalb vo Ondorreichabach koen Wäag mae gäa. So isch-s Daal bis dånã ao a naddirlicha Grenz zwischa de frijor sälbsdendiche Sdaada Wirddabärg ond Bada gwaä. Mor hådd rächds und lenggs d Heng nuffmissa, omm nåch Pforza weidor zom komma. Glei nåch dor Eisabã isch nå abor ao a Sdrås durchs Daal baud wårda, d haedicha B463.

Verwaldong ond Politigg

Onderreichabach hådd midd dor Stadt Bad Liabazell a Verwaldongsgmaeschaft.

Birgermåesdor vo Onderreichabach isch dor Carsten Lachenauer.

Wahla

Ergäbnis vo de Landdagswaala seid 2006:^[2]

Johr	CDU	Greane	SPD	FDP	Lenke¹	AfD	Sonschtiche
2016	23,7 %	34,5 %	10,4 %	6,8 %	2,2 %	18,7 %	3,6 %
2011	36,3 %	26,4 %	21,7 %	4,9 %	2,6 %		8,1 %
2006	41,4 %	11,9 %	25,1 %	12,5 %	3,7 %		5,5 %

¹ 2006: WASG, seid 2011: Die Linke

Dialäggd

Dor Dialekt vo Onderreichabach isch Schwäbisch. Sae bsondora Färbong hådd-or durch on leichda sidfrenggischa Aeschlag. So haerd-mor em Flägga "i haa gsaa" sdadd "i hao gsaed", odor "mir fare nåch Karlsru hinnere" sdadd "mir fared nåch Karlsrua hendore".

Weblink

Commons: Unterreichenbach – Sammlig vo Multimediadateie

Unter-Reichenbach in der Beschreibung des Oberamts Calw von 1860 im dütschsprochige Wikisource

www.unterreichenbach.de

Fuaßnood

↑ Statistisches Landesamt Baden-Württemberg – Bevölkerung nach Nationalität und Geschlecht am 31. Dezember 2022 (CSV-Datei).
↑ Statistisches Landesamt Baden-Württemberg: Landtagswahl uf statistik-bw.de

[Metadaten_Einwohnerzahl_DE-BW-1] Statistisches Landesamt Baden-Württemberg – Bevölkerung nach Nationalität und Geschlecht am 31. Dezember 2022 (CSV-Datei).

[2] Statistisches Landesamt Baden-Württemberg: Landtagswahl uf statistik-bw.de

[1]

[2]