Dr Volchsname, oder mit em Fachwort s Demonym, Ethnonym oder Ethnikon, isch dr Name, wo me für es Volch oder für d Bewooner vomene bestimmte Ort pruucht. Uf Französisch heisst das Gentilé.
Es isch i vilne Fäll so, ass sech d Lüüt vomene Volch oder von ere Gruppe sälber eso säget, und denn wird dä Name au vo anderne Gruppe überno zum das bestimte Volch z benenne. Es cha au sy, ass nit es ganzes Volch, sondern a Deilgruppe drvo mit emene bsundere Name agsproche wird.
Dr erscht Fall mit em Name, wo me sech sälber gitt, heisst mit em Fachwort Autonym, dr zwöit Fall heisst au Xenonym.
Volchsnäme chöme deils vo de Sprooche, wo die Lüüt redet, und deils vo andere kulturelle Eigeheite.
I dr Dütschschwiiz isch dr Name di Wälsche bekannt zum d Lüüt vo dr Weschtschwiiz, wo Französisch redet, gang und gäb.
Vom alte Volch vo de Alemanne isch i gwüssne Sprooche dr Frömdname für di Düütsche abgleitet; so heisst das bi de Franzose les Allemands und bi de Spanier los Alamanes.