Anguillidae

«Anguilla» reendreza ta iste articlo. Ta o chenero zoolochico se veiga Anguilla (chenero).

Anguillidae
Un eixemplar d'Anguilla anguilla
Denominacions populars
Anguilas, enguilas, anguillas
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Actinopterygii
Subclase:	Neopterygii
Infraclase:	Teleostei
Superorden:	Elopomorpha
Orden:	Anguilliformes
Suborden:	Anguilloidei
Familia:	Anguillidae
Descripción
Anguillidae SCHRANK, 1798

As enguilas^[1][2], anguilas u anguillas (d'o latín <ANGUILLA; cientificament Anguillidae) son una familia de peixes teleostios en a orden Anguilliformes en a que se i concabe un solo chenero, Anguilla.

As diferents especies d'anguillas habitan en os ríos de buena cosa d'o mundo, y se reproducen en as mars (sacando-ne os oceanos Pacifico y Atlantico sud y as auguas circumpolars) por o que se diz que son peixes migradors catadromos.

Descripción

Son peixes de cuerpo prolargau, con a coda muit larga de forma que adopta una lonchitut y volumen similar u superior a o de a resta d'o cuerpo.

A cabeza la tienen muit prolargada, con as mandiblas amplas y fuertes. Os uellos son chicorrons en comparanza con o total de a cabeza, y se troban adebantaus con respecto a l'articulación temporo-mandibular, de forma que a boca, cuan ye obierta, s'ubre mas ta zaga de a vertical d'ellos. Isto ye una caracteristica morfolochica de a cabeza de muitos Anguilliformes.

As aletas dorsal, adiposa y anal son parcialment fusionadas con a caudal, de forma que tot l'extrimo posterior de l'animal se presenta como si estás cubierto d'una aleta contina. As aletas pectorals son chicorronas pero muit robustas, adchacents a l'apertura branquial. No tienen aletas pelvianas.

A color d'o cuerpo ye escura, grisa verdisca u cuasi negra por alto, con a tripa y a mandibula inferior blancas u amarelliscas muit claretas.

A diferencia de muitos atros grupos de peixes, as anguillas no tienen escratas vesibles, sino que as i tienen de dimensions microscopicas. Isto fa que tiengan a piel muit fina y vulnerable, a cual cosa compensan con una secrección mucosa que les ne recubre, y que ye a responsable d'o tacto eslizoso que as caracteriza. O moco les permite, d'entre belatras cosas, d'estar os solos peixes europeus que pueden sobrevivir a periodos de cualques horas difora de l'augua.

L'alimentación ye omnivora, y gosa incluir chicoz vertebraus acuaticos cuan en tienen ocasión.

Distribución

As anguillas adultas son nocturnas y habitan en os ríos.

As diferents especies d'o chenero Anguilla habitan en os cinco continents. A mas conoixida d'istas especies ye a especie tipo de o chenero y a familia, Anguilla anguilla, dita anguilla europea u común, pus habita (u soleba habitar) en os ríos y corsos d'augua dulce d'iste continent, en arribando dica la cabecera d'os ríos y barrancos en as grans cordeleras europeas, como o Pireneu, a on que enantes yera abundant.

As fembras dipositan una grandisma cantidat de uevos (dica 3.000.000 cadaguna) chusto enantes de morir, d'a on que eclosinan as crías en un estau pre-alevín, embrional, que se conoix como larva leptocefala u simplament leptocefalo, que pasa a fer parte d'o plancton marino. As zonas de desove varían con cada especie: as anguillas europeas naixen en l'oceán Atlantico, concretament en l'aria que se conoix como a Mar d'os Sargazos, y os leptocefalos s'alimentan y creixen en as corrients ocianicas en as etapas inicials d'a suya vida.

As anguillas chóvens puyan por os ríos en un inte determinau en o suyo desarrollo, de forma alto u baixo coordinada seguntes a especie, en un fenomeno migratorio que encara no se conoix guaire bien cómo funciona. S'ha especulau que as anguilletas chóvens buscan os mesmos ríos concretos a on que vivión sus pais, pero no se'n tiene garra prebas de que en verdat as que i puyan sían descendients directas d'os adultos que marchón. As anguillas europeas penetran en a mar Mediterrania, a Baltica y belatras mars interiors dende l'Atlantico, ta dentrar dimpués en os ríos d'istas cuencas.

En Aragón, y en cheneral en toda a Peninsula Iberica, yeran animals muit comuns d'antes que se construise as grans obras hidraulicas que en l'actualidat condicionan os corsos d'augua, prencipals ta la suya migración reproductora. Se crei que a población d'anguillas d'Europa ha decreixiu a redol d'un 90% en o sieglo XX, en parte por a imposibilidat de completar a migración en a mayoría de ríos, que contan con entibos y belatras barreras imposibles de salvar ta istos animals.

Costumbres

As anguillas son especies nocturnas, que remanen amagadas de día d'entre as piedras, foratos u soterradas en l'arena en o fundo d'os corsos fluvials. Capturan moluscos, crustacios y belatros invertebraus acuaticos, mayoritariament, anque tamién consumen productos vechetals, y arriban a cazar ranas y vertebraus de dimensions reducidas.

Os hábitos nocturnos, en chunto con a dificultat de pillar-las con as mans en estar tan eslizosas, fa que a pesca d'as aguillas se faiga con medios especificos, principalment con capazos de tornallo, en os cuals os animals pueden dentrar-ie por a boca (atraius, por eixemplo, con un troz de tocín) y no en puedan surtir dimpués.

Ditos y mazadas

• «pesca l'anguila en tarquil si la quiers fer venir»^[3]

Imáchens

• 
  Eixemplar adulto d'Anguilla dieffenbachii
• 
  Detalle de a cabeza d'Anguilla japonica
• 
  Anguilla en un acuario.
• 
  Ilustración.

Se veiga tamién

• Muraenidae
• Congridae

Referencias

1. (es) Rafael Barceló Caballud Vocabulario caspolino, Institución Fernando el Católico, 2011, ISSN 0590-1626, p.113
2. (es) Fernando Romanos Hernando Dizionario aragonés de las comarcas de la Alta Zaragoza, p.52
3. (es) Pedro Arnal Cavero: Refranes, Dichos, Mazadas... En El Somontano Y Montaña Oscense, Prames, 2013, ISBN 978-8483213957, p.156

Vinclos externos

• Wikispecies tiene un articlo sobre Anguillidae.
• Se veigan as imáchens de Commons sobre Anguillidae.