Asma

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Asma.

L' asma (d'o griego antigo ἆσθμα āsthma "manca d'alentada") u pretura de peito^[1] ye una malotía inflamatoria a luengo plazo d'as vías respiratorias d'os polmons. Se caracteriza per simptomas variables y recurrents, obstrucción reversible d'o fluxo d'aire y broncoespasmos desencadenaus facilment.^[2] Os simptomas incluyen episodios de sibilancias, tos, opresión en o peito y dificultat pa alentar. Istos pueden ocurrir cualques vegadas a lo día u cualques vegadas a la semana. Seguntes a persona, os simptomas de l'asma pueden empiorar de nueiz u con l'exercicio.

Se creye que l'asma ye causau per una combinación de factors cheneticos y ambientals. Os factors ambientals incluyen la exposición a la contaminación de l'aire y los alerchenos. Atros desencadenants potencials incluyen medecinas como l'aspirina y los bloquiadors beta. Per un regular, o diagnostico se basa en o patrón d'os simptomas, a respuesta a lo tractamiento a lo largo d'o tiempo y las prebas de función polmonar per meyo d'espirometría. L'asma se clasifica seguntes a frecuencia d'os simptomas, o volumen espiratorio forzau en un segundo (FEV1) y la taxa de fluxo espiratorio maximo.^[3] Tamién se puede clasificar como atopico u no atopico, an atopia se refiere a una predisposición a desembolicar una reacción d'hipersensibilidat tipo 1.^[4]

No existe una cura conoixida pa l'asma, pero se puede controlar. Os simptomas pueden precaver-se privando los desencadenants, como los alerchenos y os irritants respiratorios, y suprimir-se con l'emplego de corticosteroides inhalaus. Se pueden fer servir agonistas beta d'acción alongada (LABA) u achents antileucotrienos amás d'os corticosteroides inhalaus si los simptomas de l'asma no se controlan. O tractamiento d'os simptomas que empioran rapidament gosa consistir en un agonista beta-2 d'acción breu inhalau, como salbutamol, y corticosteroides per vía oral. En casos muit grieus, ye posible que se requieran corticosteroides intravenosos, sulfato de magnesio y hespitalización.

En 2019, l'asma afectó alto u baixo a 262 millons de personas y causó a la raya de 461.000 muertes. A mayoría d'as muertes ocurrioron en o mundo en desembolique. L'asma a ormino prencipia en a nineza, y las taxas han augmentau significativament dende a lo decenio de 1960.^[5]

Referencias

1. (an) Diccionario ortografico de l'aragonés (Seguntes la Propuesta Ortografica de l'EFA). Versión preliminar. Estudio de Filología Aragonesa. ISSN 1988-8139. Octubre de 2022.
2. (en) National Asthma Education and Prevention Program (2007). "Guidelines for the Diagnosis and Management of Asthma". National Heart Lung and Blood Institute. 2007, pp. 11–12
3. (en) Yawn BP (September 2008). "Factors accounting for asthma variability: achieving optimal symptom control for individual patients". Primary Care Respiratory Journal. 17 (3): 138–147.
4. (en) Kumar V, Abbas AK, Fausto N, Aster J (2010). Robbins and Cotran pathologic basis of disease (8th ed.). Saunders. p. 688. ISBN 978-1-4160-3121-5.
5. (en) Anandan C, Nurmatov U, van Schayck OC, Sheikh A (February 2010). "Is the prevalence of asthma declining? Systematic review of epidemiological studies". Allergy. 65 (2): 152–67.