Asín y Azín

Asín y Azín
Os Aszín
Información personal
Ocupación:	Investigadors
Personache de cómic
Cómic:	As aventuras de Tintín
Debuixant:	Hergé
Anyo:	1934

Asín y Azín (en francés Dupond et Dupont [dy.pɔ̃]) son dos personaches ficticios creaus por o dibuixant belga Hergé en a suya serie de cómics As aventuras de Tintín. Cuan se fa referencia a os dos en conchunto se conoixen como os Aszín^[1]

Son dos achents d'a policía secreta identicos en aspecto y vestimenta, estando a unica diferencia a forma d'a suya mostaixa que en un caso apunta enta alto y en l'atro enta abaixo.^[2] Siempre apareixen chuntos y no pareixe que tiengan personalidaz guaire diferenciadas. Segurament a intención de l'autor estió la de caricaturizar un determinau tipo de funcionario. Os suyos nombres son una chanza en o sentiu de que encara que se pareixen muito, dica o punto d'entrefilar-se que son cheminucos, tienen una chicota diferencia que contrimostra que no lo son.

Cal sinyalar que son de personalidat distraita, poco agudos y a sobén incompetents pa as misions que les asignan. O suyo papel en as historietas gosa estar secundario; por un regular apareixen pa fer gags u pa aportar bel dato a Tintín.

Entre as accions habituals d'istos personaches destaca o feito de que, a sobén, quieren pasar inadvertius disvrazando-sen con o vestiu tipico d'o puesto a on se troban, encara que en realidat tienen un aspecto ridiclo. Tamién gosan entivocar-se amplament sobre lo que son investigando. Asinas mesmo ye habitual d'os dos personaches que, cuan l'un afirma una cosa, l'atro lo reitera cambeando as parolas de puesto, plegando a decir chusto o contrario u bella sinconisión. Ye tipica d'éls dos a frase: «Yo encara diría mas...»

A suya primera aparición estió en Les Cigares du pharaon, cuarto álbum d'a serie, en o que miran d'arrestar a Tintín por o suyo presunto trafico de drogas. Manimenos, en a reedición en color de Tintin au Congo, o segundo álbum d'a serie, que se publicó en 1947, Hergé ya les fa apareixer en a primera vinyeta, en a escena a on Tintín prene o tren ta encetar o suyo viache a o Congo.

Como curiosidat cal decir que tienen una efimera aparición en Astérix chez les Belges anunciando l'arribada de Chulio César.

Nombres

Placa d'una carrera de Bruselas adedicada a os dos personaches de Tintín, en francés y neerlandés

Os traductors d'a serie han mirau de trobar en as diferents luengas nombres ta ista parella que se prenuncien de manera similar u identica. Asinas, os Dupond y Dupont de l'orichinal francés s'han traduciu como:

• Uys y Buys en afrikaans
• Schultze y Schulze en alemán
• Thomson y Thompson en anglés
• Tik y Tak en arabe
• Asín y Azín en aragonés
• Johnson y Rohnson en bengalín
• Hernández y Fernández en castellano, basco y gallego
• Citserono y Tsicerono en esperanto
• Johns y Johnes en galés
• Ντυπόν y Ντιπόν en griego (Dupon y Dipon, que se pronuncian toz dos [di'pon])
• Skapti y Skafti en islandés
• Diupon y Diubon en chaponés (デュポンとデュボン)
• Clodius y Claudius en latín
• Jansen y Janssen en neerlandés
• Dupont y Dupont en persa (دوپونت و دوپونط – a diferencia ye en as dos t, que no sonan igual)
• Zigue y Zague en as antigas edicions en portugués
• Tomson y Tompson en serbio
• Kadlec y Tkadlec en checo
• 杜邦和杜庞 (Dùbāng hé dù páng) en chinés

A forma orichinal, Dupond y Dupont, s'ha conservau, entre atras, en catalán, coreano, danés, finés, indonesio, italiano, noruego, portugués, sueco y turco.

En a traducción en aragonés s'han preso dos apellius aragoneses que fan referencia a os lugars d'Asín y Acín^[3], situaus en Cinco Villas y a Chacetania respectivament.

Referencias

1. (es) Casi todo lo que querías saber sobre 'Las joyas de la Castafiore' y sus 6 nuevas traducciones. En Universo Tintín. 15 de febrero de 2019
2. (en) How to tell a Thompson from a Thomson. 9 setiembre de 2006
3. (es) Tintín, el reportero más famoso del cómic, vive también sus aventuras en aragonés. Heraldo de Aragón. 4 d'abril de 2019