Erosión

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Terrers en A Buerda. Cuan se talla a vechetación, o suelo queda desprotechiu, l'augua de plevia esgarrapa as costeras de sallagón y fa que se faigan terrers, una tipica forma d'erosión.

A erosión ye un conchunto de procesos cheolochicos externos que tiran tot u part d'os materials existents en a superficie d'o suelo, en a superficie d'as rocas u a poca fondura, modificando o releu.^[1]

A erosión la producen os diferents achents cheolochicos externos: cheleras, viento, auguas salvaches, torrents, ríos, y a mar con as ondas d'a mar y a deriva litoral, y dan como resultau formas d'erosión diferents y caracteristicas, que dependen tanto de l'achent como d'o material erosionau y as condicions d'o puesto. Por un regular a erosión se considera un proceso cheolochico que actua dimpués d'a meteorización y enantes d'o transporte, manimenos a erosión puet actuar devez que a meteorización (por eixemplo en a disolución de ciertas rocas solubles), y devez que o transporte (a erosión contina en os materials que carrían os achents cheolochicos, y os materials que carrían os achents cheolochicos contribuyen a la erosión d'o substrato por fricción).

A capacidat erosiva de l'achent predominant en una zona se diz erosividat, a susceptibilidat d'o substrato pa ser erosionau por os achents cheolochicos se diz erosionabilidat.

Acción erosiva d'as precipitacions

L'augua de plevia que no retiene a vechetación u que no s'infiltra en o suelo circula ixemenada por as laderas enta baixo podendo levar-se materials solidos si tien prou enerchía cinetica. As tronadas y as plevias torrencials chenerarán una erosión mes gran. L'augua procedent de regalar-se a nieu s'infiltrará en una mesura mes gran y tendrá menos poder erosivo. Plega un inte que l'augua que circula t'abaixo ixemenada remata en as canals d'os barrancos, torrents u ríos.

Os indicadors fisicos d'a erosión que fan as precipitacions son a erosion laminar, a erosión en lavallos y a erosión en terrers. En a erosión laminar os materials desapareixen devez a ran de tierra en una ampla superficie y ye dificil de detectar. En a erosión en lavallos l'augua que corre t'abaixo ubre sulcos de mida centimetica u decimetrica. En a erosión en terrers bi ha sulcos de mida metrica u decametrica que se veye como s'ixamplan y s'afondan fendo part d'un paisache de terrers caracteristico u de badlands.^[2]

Acción erosiva d'o viento

Cuan se parla d'o viento como achent cheolochico ye como achent d'erosión, transporte y sedimentación de particlas. O viento actua como achent erosivo en materials sueltos de mida arena, limo u archila cuan no son cubiertos de vechetación ni humidos, porque la vechetación proteche y a humidat los cohesiona y une. L'acción eolica se produce en arias deserticas, semideserticas, en costas y en zonas periglacials. Tamién puet actuar en atras zonas cuan por desforestación, sobrexplotación d'o suelo, por sequera u por as tres cosas o suelo ye seco y desprotechiu, como se desvinió en a decada de 1930 en Estaus Unius^[3]

O viento ye un achent muito selectivo, y dependendo d'a enerchía que tienga podrá mover unas particlas u atras de diferents trazas: saltación u suspensión. A saltación afecta sobre tot a l'arena fina. A suspensión afecta sobre tot a lo limo, que se mantién en suspensión por as turbulencias de l'aire.

Dimpués de levar-se o viento as particlas finas (deflación eolica), quedan as particlas de mida gran, quedando una superficie pedregosa dita "desierto de piedras" u reg.

L'aire queda cargau con particlas y ye capaz d'esgarrapar os obstaclos que se troba por a on circula (abrasión eolica). Os tormos y penyas prenen forma de fongo porque l'aire ye mes cargau amán d'a superficie y s'erosionan mes por abaixo. Tamién se pueden formar puents naturals. Os catens, ruellos y cantals son esgarrapaus en o sentiu de l'aire y desembolican superficies planas y ariestas tornando-se ventifractos.

Referencias

1. Alain Foucault y Jean-François Raoult Diccionario de Geología. Masson, 1985.
2. (es) Diodora Calvo Aldea, Maria Teresa Molina Álvarez, Joaquín Salvachúa Rodríguez: Ciencias de la tierra y medioambientales. 2º Bachilleraro. 2010 McGraw-Hill, pp 298-299
3. Francisco Anguita Virella, Fernando Moreno Serrano. Procesos geológicos externos y geología ambiental. Editorial Rueda, 1993.

Bibliografía

• (es) Diodora Calvo Aldea, Maria Teresa Molina Álvarez, Joaquín Salvachúa Rodríguez: Ciencias de la tierra y medioambientales. 2º Bachilleraro. 2010 McGraw-Hill.