Mechana

A mechana d'o Pabillón Puent en Zaragoza

Una mechana^[1][2] u meyana^[1][2] ye una isla en o cauz d'un río. Un curso fluvial con muitas mechanas ye un río braided.

Estas islas se fan mes a sobén dende Zaragoza ta abaixo. Puede haber-ie selvas de ribera. Bels propietarios i crían reses bravas aproveitando que no se'n pueden escapar.

O Pabillón Puent tien o suyo soporte prencipal en una mechana.

Etimolochía

O termin "mechana" provién d'o latín mediāna, que ye en meyo.

Por estar caracteristicas de l'Ebro adintro d'o dominio orichinal d'o romanz navarro-aragonés, reciben esta denominación tradicional as que bi ha en o río Ebro, en atros ríos d'Aragón con atras condicions pueden recibir atras denominacions, como rambla, que no s'han de confundir con as ramblas como cursos torrencials d'augua en zonas de clima mediterranio. O mesmo esdevién con l'anglés Ait, que se refiere sobre tot a las mechanas d'o río Tamisa.

O termin mechana puet estar un catalanismo fonetico como trachinero, porque en a parla de Fayón se'n diz mitjana; ye posible que a forma mechana con fonetica catalana s'haiga difundito a causa d'o comercio fluvial de l'Ebro entre o curso baixo y o curso meyo. En castellano d'Aragón se puede sentir mechana, pero tamién se puede trobar castellanizato como mejana.

Referencias

1. (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
2. (an) Chesús Casaus Parrilla, Pascual Miguel Ballestín: Dizionario Aragonés de Terminos Cheograficos. Ainas. Gara d'Edizions. ISBN 978-84-8094-059-7