On þissum geare, mlxui man halgode þet mynster æt Westmynster on Cildamæssedæg 7 se cyng Eadward forðferde on twelfta mæsse æfen. 7 hine mann bebyrgede on twelftan mæssedæg. innan þære niwan halgodre circean on Westmynstre.
7 Harold eorl feng to Englalandes cynerice. swa swa se cyng hit him geuðe. 7 eac men hine þær togecuron. 7 wæs gebletsod to cynge on twelftan mæssedæg.
7 þy ilcan geare þe he cyng wæs. he for ut mid sciphere togeanes Willelme. 7 þa hwile com Tostig eorl into Humbran mid lx scipum. Eadwine eorl com mid landfyrde 7 draf hine ut. 7 þa butse carlas hine forsocan. 7 he for to Scotlande mid xii snaccum. 7 hine gemette Harold se Norrena cyng mid ccc scipum. 7 Tostig him tobeah. 7 hi bægen foran into Humbran. oð þet hi coman to Eoferwic 7 heom wiðfeaht Morkere eorl. 7 Eadwine eorl. 7 se Norrena cyng ahte siges geweald. 7 man cydde Harolde cyng hu hit wæs þær gedon 7 geworden. 7 he com mid mycclum here Engliscra manna. 7 gemette hine æt Stængfordes brycge. 7 hine ofsloh. 7 þone eorl Tostig. 7 eallne þone here ahtlice ofercom.
7 þa hwile com Willelm eorl upp æt Hestingan on sancte Michaeles mæssedæg. 7 Harold com norðan 7 him wiðfeaht ear þan þe his here come eall. 7 þær he feoll. 7 his twægen gebroðra Gyrð 7 Leofwine.
7 Willelm þis land geeode. 7 com to Westmynstre. 7 Ealdred arcebiscop hine to cynge gehalgode. 7 menn guldon him gyld. 7 gislas sealdon. 7 syððan heora land bohtan. 7 ða wæs Leofric abbot of Burh æt þæt ilca feord. 7 sæclode þær 7 com ham. 7 wæs dæd sone þær æfter on ælre halgan mæsseniht. God are his saule. On his dæg wæs ealle blisse 7 ealle gode on Burh. 7 he wæs leaf eall folc. swa þæt se cyng geaf sancte Peter 7 him þæt abbotrice on Byrtune. 7 se of Couentre þæt se eorl Leofric þe wæs his eam ær heafde macod. 7 se of Crulande. 7 se of þorneie. 7 he dyde swa mycel to gode into þæt mynstre of Burh on golde 7 on seolfre 7 on scrud 7 on lande. swa nefre nan oðre ne dyde toforen him ne nan æfter him. Þa wearð gildene burh to wrecce burh. Ða cusen þa munecas to abbot Brand prouost. forðan þæt he wæs swiðe god man 7 swiðe wis. 7 senden him þa to Ædgar æðeling. forðan þet þe landfolc wendon þæt he sceolde cyng wurðen. 7 se æðeling hit him geatte þa bliþolice. Þa þe cyng Willelm geherde þæt secgen. þa wearð he swiðe wrað. 7 sæde þæt se abbot him heafde forsegon. Þa eodon gode men heom betwenen 7 sahtloden heom forðan þæt se abbot wæs goddera manne. Geaf þa þone cyng xl marc goldes to sahtnysse. 7 þa lifede he litle hwile þær æfter buton þry gear. Syððon comen ealle dræuednysse 7 ealle ifele to þone mynstre. God his gemyltse. .[1]