تعليم
التعليم هو مجال كيهتم ب طرقان التلقين و التعلم ف لمدارس و مؤسسات بحالها و كيشمل عمليات لي كاتخلي بنادم يشد مجموعة من لمهارات ولمعارف. وكاتعني حتا كيفاش لمعاونة د الناس يديرو شي حاجة و الدعم ديالهوم باش يفكرو فشنو تعلمو.[1]
ب التعليم، لمعرفة ديال شي مجتمع ولا دولة ولا حتا لعالم كولو كاتنتاقل من جينراسيون لجينيراسيون خرا. هادشي داخل فيه التعليم ديال لأخلاق، متلا تعلم لكيفية د التعامل مع ناس و كيفاش يولي لواحد مواطن مزيان.
تعليم ممكن يعاون ويوجه لأفراد من مستوى لمستوى. ناس لي قاريين يقدرو يديرو بزاف د لحوايج، بحال أنهم يعاونو ناس لي ماقاريينش، ويشجعوهم باش يتعلمو.
كاينين بزاف ديال الطرق باش كيتصنف التعليم، متلا لعمر ولا لمادة. وحدة من هاد الطرق هي واش راه نيضامي ولا ماشي نيضامي.
- التعليم النيضامي غالبا كيكون فلمدرسة، لي فيها كيتعلم لواحد لمهارات ديال لاباز و لمعارف لأكاديمية. دراري صغار كيقراو ف لحضانة ولا روض، ولكن التربية النيضامية غالبا كاتبدا غير من التحضيري، ؤ كاتكمل الليسي، ومن بعد لجامعة لي كاتخليك تخرج بشهادة أكاديمية.
- التعليم لماشي نيضامي هو نوع ما منضمش بزاف، يقدر يكون واحد من لعائلة كيقري بنتو كيفاش تركب ل پيكالة، ولا يعلم ولدو كيفاش يطيب شي أكلة. هاد نوع ديال تعليم داخل فيه ناس لي كيتعلمو من لكتوبا أولا من شي سيت فلانترنت. داخل فيها حتا محو لأمية ديال الناس لكبار، وسوايع بنسبة ل التلامد. فهاد نوع ديال التعليم، شي واحد لي ماشي بضرورة ف لمدرسة يقدر يتعلم كيفاش يقرا ويكتب، أولا يتعلم كيفاش دير شي حرفة.
بزاف ديال لمدارس كتوفر لقراية فابور من الدعم ديال الدولة. لعائلات يمكن ليهم يسيفطو ولادهم يقراو ف لپريڤي، ولكن كايخصهوم يخلصو كلا شهر. فشي بلايص لي مافحالهمش، دراري ميمكنش ليهم يمشيو للمدرسة حيتاش الدول ديالهم ماموفراش ليهم لمدارس، ولا حيتاش لأسر ديالهم ميقدروش يوفرو لفلوس باش يقريو ولادهم، ولا حيتاش لولاد خاصهم يخدمو وهوما صغار، وفشي مجتمعات كاينا واحد نضرة سلبية ل تعليم ديال لبنات.
فأغلب لبلايص ف لعالم تعليم لبتيدائي و التانوي تايكون فابور حيتاش مدعوم من الدولة، وفشي بلدان تايكون حتا تعليم لجامعي فابور، ولكن والاكين ف بلدان خرا تايكون ب لفلوس.
|
تقدر تزيد شوف بزاف د تّصاور و لمعلومات ديال Education ف ويكيميديا كومنز. |
- ^ "Britannica, education". مأرشيڤي من لأصل ف 2023-10-13. تطّالع عليه ب تاريخ 2023-03-17.