رشمة

بوتمن ضلوع حمر كيرشم ل بلاكة وقف وخا تا حاجة ماتكون مكتوبة فيه
لبانضة لبيضا لمربوطة ب هاد الشكل كاترشم عادةً ل التضامن معا شي قضية ؤلا حملة، متلاً ضد لكونصير

الرشمة[ن.ل 1] (ب لعربية: رمز‎، ب نّݣليزية: symbol) هيّ واحد لعلامة ؤلا كلمة لي كاتشير، كاتعني، ؤلا كاتّفهم ب عتبارها كاتمتّل واحد لفكرة، ستون ؤلا علاقة. الرشمات كيخلّيو بنادم يتجاوز داكشي لي معروف ؤلا لي كيتشاف، باش يديرو علاقات بين مفاهيم ؤلا تجارب مامتعلقاش مبدئيا معا بعضياتها.

التواصل و لپروصيصاج د الداطا كيعتامدو بشكل كامل على التخدام د الرشمات. الرشمات كياخدو الشكل ديال كلمات، أصوات، حاراكات ب ليد، فكرة، ؤلا تصويرة، و كيتخدّمو باش يوصّلو أفكار خرين ؤلا معتقدات. متلاً بوتمن ضلوع لونو حمر أغلبية د الناس غادي يفهموه بلي كيعني بلاكة سطوپ، وخا تا كلمة ماتكون مكتوبة فيه.

الرشمات وسيلة د التواصل لمعقد، و نفس الرشمة يقدرو يكونو عندها شلا معاني على شحال من مستوى.[2] الرشمات هوما الساس ديال لفهامة عند بنادم، و هوما باش كيتم التبادل ديال لمعرفة.[3] حيت الرشمات هوما باش بنادم كيفهم و كيحكم على لعالم لي ضاير بيه، كيدخلو تا ف إطار لهوية و التعاون ف لمجتمع. التقافات د بنادم كيستعملو الرشمات باش يعبّرو على قلدات جتيماعية، إديولوجيات، و مضاهر خرين لي كيخصّو كلا تقافة.

نوطات لوغاوية

[بدل | بدل لكود]
  1. ^ الرشيم ؤلا الرقيم ف الداريجة هوّ الطرز. لمرا لي كاتدير الطرز كاتسمى رشّامة ؤلا رقّامة. هاد لكلمة أصلها من لفيعل "رشم" لي كيعني "كتب" ؤلا خلّا شي أتار[1]

مصادر

[بدل | بدل لكود]
  1. ^ محمد بوسلام (2018). معجم الدارجة المغربية: الجذور و الاختلافات الجهوية، الجزء 2. ص. 169. ردمك 9789920352208.
  2. ^ Womack, Mari (2005). Symbols and Meaning: A Concise Introduction. California: AltaMira Press.
  3. ^ Langer, Susanne K (1953). A Theory of Art, Developed From: Philosophy in a New Key. New York: Charles Scribner's Sons.