لمشبوح
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
لمشبوح (ب النڭليزية Orion's belt) هوما تلاتا د نجوم لّي كايبانو مزيان فوصت سّما.
جاو ف لكوكبة ديال ؤرايون ؤلا الجبّار ؤلا الصياد لكبير (السميات كيختالفو على حساب التقافة). هاد النجمات التلاتة كيتسماو شي مرات "لخواتات التلاتة" و سمياتهوم عند لفلكيين لعرب هوما النطاق، النيلم، و لمنطقة. هاد النجوم كيبانو متقاربين بزاف من لأرض بحال يلا نجمة وحدة، وخا هوما تلاتة د النجوم متباعدين.
زيادة على دكشي، لمشبوح كايلعب دورة بحال ماڭانة نتاع لّيل. بعد لبعضين كايسمّيوه "ميزان لّيل" على حقّّّاش كايبان شويا منبعد لمغرب و كايغبر شويا قبل لفجر.
الشوفان د لمشبوح كان كيعاون لفلاحا باش يعرفو وقات لحرت و لحصاد. و لمصطلح د لمشبوح كانلقاوه ف لمتال الشعبية لفلاحية بحال:[1]
يلا طلع لمشبوح عند لمغرب
رمي لمحرات و هرب
و يلا طلع لمشبوح مع لعشا
لوح زّرع بلكمشة
و ڭول : لعام مشى[2]
و مدكور تا ف لملحون بحال ف لقصيدة ديال عبد العزيز المغراوي ب عنوان "برڭ النو":
عن خدودك لاح المشبوح بالضيا في وقت الصحو *** و نشهر نورك شعشع ضاوي *** صبحت فجوة
و قصيدة "عيون لمهرة" ديال السي التهامي المدغري:
إمتى ونايا مبطوح *** من هواك أ نجم المشبوح
- ^ "الكواكب و الملحون : المشبوح". 2021-10-08. تطّالع عليه ب تاريخ 2024-01-29.
- ^ مدكور في كتاب ديال سماعيل بوجنان "L'agriculture à travers l'oraliture" صفحة 22 ميتال رقم 12