ليپسيس ماݣنا
ليپسيس ماݣنا
| ||
| ||
| معلومات عامة | ||
| نوع د لموضع | مدينة قديمة، موقع أركيولوجي، سوق و مدينة رومانية | |
| لبلاد | ليبيا | |
| تاريخ د لبني | لقرن 7 قبل لميلاد | |
| تاريخ فاش تهجرات | 637 | |
| مساحة | 387.485 | |
| مدكورة ف | Atlas of Vanishing Places | |
| لقيمة لأثرية | ||
| فترة زمنية | لإمبراطورية الرومانية | |
| مستوى تراتي | موقع تراث عالمي | |
| معيار الترات لعالمي | (i)، (ii) و (iii) | |
| لبلاصة | ||
| لمدينة | الخمس | |
ليپسيس ماݣنا ؤلا ليپكيس ماݣنا ؤلا ليپتيس ماݣنا ؤلا لبدة لكبيرة (ب لّاتينية Lepcis Magna ؤلا Leptis Magna، ب لبونيقية 𐤋𐤐𐤒 لپق ؤلا 𐤋𐤐𐤒𐤉 لپقي، ب لعربية لبدة الكبرى) هيّا مدينة أترية كاينة دابا ف مدينت الخمس ف ليبيا، ف لفم ديال وادي لبدة. ليپسيس كانت من بين أهم لمدون ديال شمال إفريقيا تحت سّيطرة ديال لقرطاجيين ؤ موراهوم نّوميديين، عاد رّومان. طاحت موراها ف يد لڤنداليين ؤ تعرّضات ل هجمات كتيرة، آخير وحدة من طاراف لݣيش د لمسلمين ف لقرن سّابع لي موراها تهجرات بشكل نيهائي.
ليپتيس ماݣنا هيّا لمدينة لي تزاد ؤ كبر فيها لإمبراطور رّوماني سيپتيميوس سيويروس Septimius Severus، لي كانت لوغتو د لم هيّا لبونيقية، ؤ هيّا أكتر موقع أتاري ف شمال إفريقيا لي تّحفض مزيان ؤ بقا لبني ديالو واقف ؤ مصون.
ليپتيس كانت ديجا تأسسات معا لّخر ديال لقرن سّات قبل لميلاد ؤ كانت موقع ديال تّيجارة لفينيقية. علا حساب سالوستيوس، تّأسيس كان من طاراف بحّارة من صيدا لي دابا كاينة ف لوبنان ، لي كانو هربو من شي صداع كان طاري ف مدينتهوم. پلينيوس لقديم ؤ سيليوس إيطاليكوس ب لموقابيل ݣالو بلي لبحارة كانو من مدينت صور لّبنانية. هاد لمطايفة مابين صيدا ؤ صور علا شكون فيهوم أسسات موستعمارات ف لبحر دّخلاني كان كيطرا بزاف، ؤ شي مرات حتا مدون "فينيقية" خرة بحال بيروت كانت كاتدخل فيه، ؤ عندو أبعاد سياسية لي ماكاتعتامدش ب ضّارورة علا حقايق تاريخية. ف لواقع، بزاف د لحرايفية د تّاريخ كيعتاقدو بيلا قرطاج هيا لي أسسات لمدينة د ليپتيس، ؤ كاين ݣاع حتيمال بلي هيّا ف لأصل مدينة محلية أسسوها لأمازيغ، بحال بزاف د لمدون لي تمات لفينقة ديالها ف شمال إفريقيا.[1]
معا لبدية ديال لقرن تّاني ق.م كانت ليپتيس ديجا تابعة ل قرطاج، ؤ موراها طاحت ف يد نّوميديين بعد لحملة لعسكارية ديال لماليك ماسينيسا.
ف لحروب د يوغرطن (112 تال 105 قبل لميلاد)، لّيپتيسيين غادي يكونو ف صّف ديال رّومان ضد لماليك يوغرطن. مي ف لحرب لأهلية رّومانية د 40 قبل لميلاد، غادي يكونو معا نّوميديين ؤ لپومپيين. علا حساب لمؤريخ رّوماني سالوستيوس، لأمازيغية حتا هيّا كانت مهضورة ف ليپتيس، بسباب جّواج ديال لّيپتيسيين معا نّوميديين، ولاكين تّقاليد ديالها لبونيقية ماتأتروش ب هادشي ، حيت كانت بعيدة علا لعاصيمة د نوميديا سيرتا.[2]
ف لفترة رّومانية، حافضات ليپتيس ماݣنا علا تّقاليد ؤ لّوغة ديالها لبونيقية (لفينيقية لغربية) حتال لقرن تّالت لميلادي، كيما كيبينو عاداد د شّواهد تّاريخية ؤ لأركيولوجية، بحال شّقفات د لفلوس ؤ نّقيشات ف لبني، ؤ حتا تّسيير لإداري ؤ لمناصب، بحال لمنصب د شوفيط لي بقا مستامر من لفترة لقرطاجية.[1]
- ^ a b دجوزيفين كوين (2018). In Search of the Phoenicians [ف طور تّقلاب علا لفينقيين] (ب نڭليزية). مطبعات ديال جامعة پرينسطون. ص. 154.
- ^ سالوستيوس. تاريخ لحروب د يوغرطن، فقرة 78 (ب نڭليزية). مأرشيڤي من لأصل ف 2023-06-06. تطّالع عليه ب تاريخ 2021-10-31.
