مجرة

إن دجي سي 4414، مجرة ببوشية عادية ف لكوكبة د كوما بيرينيكيس Coma Berenices، عندها دياميطر د 55000 سنة ضوئية و بعيدة على لأرض ب علاين 60 مليون سنة ضوئية

لمجرة ؤلا لمجرّ[ن.ل 1] (نّݣليزية: galaxy) هي سيستيم ديال النجوم، الشياطة النجمية، لڭاز بين النجوم، لغبرة لكونية، و لمادة لكحلة مرتابطة معا بعضياتها ب الجابدية. لمجرة فين كاينة لأرض و لمجموعة الشمسية كاتسمى ب الداريجة مجر لكبش (ب النڭليزية Milky Way). و فيها علاين 100 مليار نجمة ؤلا كتر ڭاع. كاينين مجرات صغار كيتسماو "مجرات قازامة" كيكونو فيهوم غير مئات لملاين د النجوم،[1] و مجرات مڭضرة لي واصلين تال 100 تريليون نجمة. جميع النجوم ف مجرة كيضورو على لمركز ديالها لي كيكون فيه محفّر كحل black hole.[2] أغلبية د لمادة ف مجرة كاتكون مادة كحلة لي ماكاتشافش، ولاكين كاتفاعل معا لقوة د لجابدية و كاتأتر ف باقي لمادة لي كانشوفو على شكل نجوم، كواكب و سدوم.

لمجرات كيتصنفو على حساب الشكل ديالهوم ل مجرات إهليلجية elliptical galaxies، ببوشية spiral galaxies ؤلا مخربقة irregular galaxies. بزاف منهوم عندهوم محفّر كحل مڭضّر ف لمركز ديالهوم. مجرة لكبش ديالنا عندها محفر كحل مڭضر سميتو ساجيطاريوس A نجمة لي لكتلة ديالو كاتساوي علاين 4 د لمليون مرة لكتلة د الشمش. لمجرة GN-z11 هي أبعد مجرة معروفة ل حد الساعة من لموضع فين كاينة لأرض (مارس 2016)، و كاتواجد على بعد 32 مليار سنة ضوئية، و كانشوفوها دابا كيما كانت غير 400 مليون عام مورا التفرڭيعة لكبيرة.

كاينين علاين 200 مليار مجرة ف لكون لمتشاف.[3] أغلب لمجرات عندها دياميطر مابين 1000 ل 100.000 پارصيك (علاين 3000 ل 300.000 سنة ضوئية) و لمسافات بيناتهوم كيتحسبو ب لملاين د لپارصيك، ؤلا "ميڭاپارصيك". مجرة "مجر لكبش" عندها دياميطر د 26.800 پارصيك (87.400 سنة ضوئية) علّاقل، و لمسافة ديالها على أقرب مجرة ليها أندروميدا (بدياميطر د 152.000 سنة ضوئية) واصلة ل 780.000 پارصيك (2.5 مليون سنة ضوئية).

لفضاء بين لمجرات عامر ب ڭاز خفيف ب موعدال د لكتافة كيساوي قل من درة وحدة ل كلا ميترو مكعب. أغلبية د لمجرات خلاتها لجابدية ديالها تّجمع على شكل ڭروپات د لمجرات، عناقد و عناقد مڭضرين. مجر لكبش طرف من لڭروپ لمحلي Local Group لي أكبر مجرة فيه هيّ أندروميدا. هاد لڭروپ طرف من لعنقود لمڭضر د لعدراء Virgo Supercluster. على مستويات عالية، التجمعات لمجرية كيشكّلو "خيوط" و "وراق" كيضورو على خويات مڭضرين Supervoids. لڭروپ لمحلي و لعنقود لكبير د لعدراء بجوج كينتاميو ل واحد لقلدة كونية cosmic structure كبر منهوم بزاف لي كاتسمى لانياكيا Laniakea.[4][5][6][7]

تصاور

[بدل | بدل لكود]
  • جوج مجرات كيندامجو معا بعضياتهوم
    جوج مجرات كيندامجو معا بعضياتهوم
  • ليسر: ARP-MADORE2115-273 ميتال نادر ديال جوج مجرات كيندامجو، و كاتبان ف السما د النص الجنوبي د لأرض. ليمن: ARP-MADORE0002-503 مجرة ببوشية دروعها كبار بشكل ماشي معتاد و كاينة على بعودية د 490 مليون سنة ضوئية.
    ليسر: ARP-MADORE2115-273 ميتال نادر ديال جوج مجرات كيندامجو، و كاتبان ف السما د النص الجنوبي د لأرض. ليمن: ARP-MADORE0002-503 مجرة ببوشية دروعها كبار بشكل ماشي معتاد و كاينة على بعودية د 490 مليون سنة ضوئية.
  • مجال د هابل
    (ڤيديو د 50 تانية)
مجرات (من لفوق علّيسر تال لتحت علّيمن): NGC 7541, NGC 3021, NGC 5643, NGC 3254, NGC 3147, NGC 105, NGC 2608, NGC 3583, NGC 3147, MRK 1337, NGC 5861, NGC 2525, NGC 1015, UGC 9391, NGC 691, NGC 7678, NGC 2442, NGC 5468, NGC 5917, NGC 4639, NGC 3972, مجرات د لونطين, NGC 5584, M106, NGC 7250, NGC 3370, NGC 5728, NGC 4424, NGC 1559, NGC 3982, NGC 1448, NGC 4680, M101, NGC 1365, NGC 7329, NGC 3447

نوطات لوغاوية

[بدل | بدل لكود]
  1. ^ على حساب لباحت جورج كولان، لمغاربا ف لقديم كانو كيسمّيو لمجرة ديالنا "مجرّ لكبش"

عيون لكلام

[بدل | بدل لكود]
  1. ^ Howell، Elizabeth؛ Harvey، Ailsa (11 فبراير 2022). "How many stars are in the universe? - Can we estimate the total number of stars?". Space.com. مأرشيڤي من لأصل ف 2 غشت 2023. تطّالع عليه ب تاريخ 16 يوليوز 2022.
  2. ^ Howell، Elizabeth؛ Harvey، Ailsa (11 فبراير 2022). "How many stars are in the universe? - Can we estimate the total number of stars?". Space.com. مأرشيڤي من لأصل ف 2 غشت 2023. تطّالع عليه ب تاريخ 16 يوليوز 2022.
  3. ^ "Astronomers were wrong about the number of galaxies in universe". The Jerusalem Post - JPost.com (ب نڭليزية). مأرشيڤي من لأصل ف January 14, 2021. تطّالع عليه ب تاريخ 2021-01-14.
  4. ^ Gibney، Elizabeth (2014). "Earth's new address: 'Solar System, Milky Way, Laniakea'". Nature. doi:10.1038/nature.2014.15819.
  5. ^ NASA (2 ماي 2019). "Hubble astronomers assemble wide view of the evolving universe". EurekAlert!. مأرشيڤي من لأصل ف 24 مارس 2021. تطّالع عليه ب تاريخ 2 ماي 2019.
  6. ^ "Hubble Returns to Science Operations". مأرشيڤي من لأصل ف 19 يوليوز 2021. تطّالع عليه ب تاريخ 26 يوليوز 2021.
  7. ^ "Squabbling Galactic Siblings". مأرشيڤي من لأصل ف 26 يوليوز 2021. تطّالع عليه ب تاريخ 16 يوليوز 2021.