ڤانادينيت
ڤانادينيت
| ||
| ||
| خاصيات | ||
| فورمولة | Pb₅(VO₄)₃Cl | |
| كتافة | 6.88 ڭرام ل السنتيميتر-مكعب | |
| ليكتيشاف | ||
| تسمّى على | ڤاناديوم | |
| لقلدة لكيماوية | ||
| [[فيشي:|180بك|]] | ||
لڤانادينيت هوّا معدن لفورمولة لكيماوية ديالو هيّا Pb5(VO4)3Cl، ؤ هوّا خلطة طبيعية د رّصاص ؤ لكلور ؤ لڤاناديوم. تّكتاشف ل لمرة لّولة ف لمكسيك ف 1801 قبل ما يتكتاشف لعنصر د لڤاناديوم. نّواع لّي ماشي نقية منو كيكون مخلط معاها لكالسيوم، لفوسفور ؤلا لأرسينيك.[1][2]
لمناجم د ميبلادن ف إقليم ميدلت معروفين علا لمستوى لعالمي بلي كيتّلقا فيها ڤانادينيت ب جودة عالية. لفانادينيت هوّا لمصدر صّيناعي رّئيسي د لڤاناديوم. بلايص خرين فين كيتّجبد كاينين ف لارجونتين، ناميبيا، لمكسيك ؤ لميريكان.[3]
سّمية ديال هاد لمعدن جات من تّركيبة ديالو لّي فيها لعنصر لكيماوي د لڤاناديوم.
لڤانادينيت معدن مامنتاشرش بزاف، حيت ماكيتكون غير علا طريق تحول كيماوي ديال معدن أخور. داكشي علاش كيتعتابر معدن تانوي. كيتّلقا عادة ف لمناخات نّاشفة، ؤ كيتشكل ب لأكسدة ديال لمعادن لّي مكونة من رّصاص. ف بزاف د لحالات كيكون ف نفس لموضع معا لمعدن لّي كيتسما ݣالينا، لّي مكون من لكبريت ؤ رّصاص. كاينين معادن خرين كيكونو معاه بحال لوولفينيت، لپيرومورفيت، لميميتيت، دّيسكلوازيت، لكيروسيت، لموطراميت، لأنݣليسيت، لّيمونيت، ؤ لباريت.[1]
لڤانادينيت تكتاشف ف لمكسيك من طاراف لمعادني سپنيولي أندريس مانويل ديل ريو ف 1801. ديك سّاع كان سمّاه رّصاص لقهوي، ؤ دار فرضية بلي كيحتاوي علا عنصر كيماوي جديد، ولاكين منبعد تراجع علا لفرضية ديالو. ف 1830، شّيميست سّويدي نيلس ݣابرييل سيفستروم كتاشف عنصر جديد سمّاه ڤاناديوم، ؤ تبين مورا داكشي بلي هوّا نفس لعنصر مناش مكون لمعدن لّي كتاشف ديل ريو. من 1838 ولات سّمية ڤانادينيت هيّا لّي منتاشرة من بعد ما تّكتاشف مرة خرة ف لمكسيك.[4]
من بين لخصايل ؤلا لخاصيات ديال لڤانادينيت كنلقاو:
- لّون: ليموني حمر، حمر قهوي، قهوي، حمر كيبري، صفر، بيض باهت، صفر باهت بحال تّبن، بلا لون ؤلا ب لون باهت تحت شّعا
- لقسوحية: 2½ - 3
- لبريان: تحتادامانتيني (كيبري قل من لأدامانتين)، صمغي
- سّيستيم لكريسطالي: سداسي
- لكتافة: 6.88 ݣرام/سنتيميتر مكعب
لڤانادينيت عندو نفس لبنية لكريسطالية ديال لميميتيت ؤ لپيرومورفيت، ؤ معا معادن خرين كيشكلو لݣروب ديال أپاتيت.[5] ف لاسيد نّيتري كيتحلل لڤانادينيت ل محلول صفر، ؤ ف لاسيد لهيدروكلوري كيتحلل ل محلول لونو خضر، ؤ كيتشكل منو كلوريد رّصاص.[1]
- ^ a b c "Vanadinite" (ب نڭليزية). مأرشيڤي من لأصل ف 2023-05-14. تطّالع عليه ب تاريخ 25 يونيو 2021.
- ^ "Vanadinite is a mineral belonging to the apatite group of phosphates" (ب نڭليزية). مأرشيڤي من لأصل ف 2023-05-29. تطّالع عليه ب تاريخ 25 يونيو 2021.
- ^ "Mibladen mining district" (ب نڭليزية). مأرشيڤي من لأصل ف 2023-05-30. تطّالع عليه ب تاريخ 2021-06-25.
- ^ خ. أ. بوسطامانطي دي موناسطيريو (1990). "[لمحطات لموهيمة ف شّيمي سپنيولية ف وقت تّورة لكيماوية ف لقرن تمنطاش] Highlights of Spanish chemistry at the time of the chemical revolution of the 18th century". Fresenius' Journal of Analytical Chemistry. 337 (2): 225–228. doi:10.1007/BF00322401.
- ^ "Apatite Group" (ب نڭليزية). مأرشيڤي من لأصل ف 2023-05-30. تطّالع عليه ب تاريخ 2021-07-06.
|
تقدر تزيد شوف بزاف د تّصاور و لمعلومات ديال Vanadinite ف ويكيميديا كومنز. |