الظاهر قانصوه
| الظاهر قانصوه هوه حاكم مصر رقم 445 |
|---|
| ||||
|---|---|---|---|---|
| معلومات شخصيه | ||||
| تاريخ الميلاد | سنة 1473 | |||
| تاريخ الوفاة | سنة 1500 (26–27 سنة) | |||
| معلومات تانيه | ||||
| المهنه | سياسى | |||
تعديل مصدري - تعديل  | ||||
السلطان الملك الظاهر ابو سعيد قانصوه من قانصوه الأشرفى قايتباى ، تالت و عشرين سلاطين الدوله المملوكيه البرجيه (الشركسيه)، قعد على عرش مصر سنة 1498 و هو عنده اقل من تلاتين سنه و استمر فى الحكم لسنة 1500. اسمه " من قانصوه الأشرفى " لإن استاذه كان الامير " قانصوه الألفى " اللى اداه للسلطان " الأشرف قايتباى ". كان خال السلطان " الناصر محمد بن قايتباى " فكانت الناس بتسميه " خال السلطان ". المصريين فرحوا بسلطنته بسبب كرههم للناصر محمد بن قايتباى اللى حكم قبله. اشتهر بإسم " السلطان ماعرفش ".
قبل السلطنه
[تعديل]قانصوه كان فى منصب " الدواداريه الكبرى " وقت سلطنة ابن أخته السلطان الناصر ابو السعادات. ابو السعادات كان شاب صغير عنده سبعتاشر سنه و كان مشهور بالطيش و سؤ التصرف و ضعف الشخصيه و كان بيصاحب الأوباش و الحرافيش من سنةة الناس و ده اتسبب فى سؤ علاقته بالامرا و رجال الدوله و لحد بخاله " قانصوه " اللى كان دايم بيساعده و بيقف جنبه فى ازماته مع الامرا. لكن الامرا بزعامة " ازبك " و " طومان باى " (العادل) فى الاخر قرروا انهم يزيحوه فقتلوه سنة 1498 بعد ما اتفقوا مع خاله قانصوه انه يتسلطن مكانه اذا قتلوه.
السلطنه
[تعديل]
بعد ما اتقتل ابو السرجعت الامرا بايعوا خاله " قانصوه " زى ما كانو اتفقوا معاه و اتلقب بالملك الظاهر. الامير ازبك كان اول واحد يبايعه و يبوس له الارض مع انه كان بيعتبر نفسه احق بالسلطنه ، فعينه قانصوه أتابك للجيش و رقى طومان باى لمنصب " الدواداريه الكبرى " اللى كانت منصبه قبل ما يتسلطن و اداله عليه كمان مناصب الوزاره و الاستداريه كمكافأه ليه على دوره الرئيسى فى الاطاحه بالسلطان ابو السعادات.
قانصوه فى الحقيقه كان مجرد سلطان بالاسم و اللى بيحكموا كانو الامرا اما هو فماكنش بيبت فى حاجه و اذا حد سأله عن حاجه كان بيرد يقول " ماعرفش " لدرجة ان المصريين بقوا يسموه " السلطان ماعرفش ". بيقول المؤرخ ابن إياس انه " كان مسلوب الإختيار مع الأمراء ".
الامير طومان باى من جهته رغم المناصب اللى ادهاله السلطان قانصوه كان طمعان فى السلطنه لكن كان خايف من الأتابكى " جان بلاط " ، فإبتدا يتآمر مع نايب الشام " قصروه " المتمرد على السلطه فى مصر ، و لما عرف قانصوه باللى بيحصل انتشرت اشاعه بإنه امر بالقبض على طومان باى و هو فى الصعيد. الإشاعه دى ، زى ما بيقول ابن إياس ، كانت السبب فى زوال سلطنة قانصوه لإن الامرا لما سمعوا الإشاعه و صدقوها قرروا انهم يخلصوا من قانصوه فلما عرف بتدبير الامرا هرب منهم و دخل قسم الحريم فى قلعة الجبل و اتنكر فى هدوم واحده ست و ما حدش عرف هو راح فين.
الامرا خلعوا قانصوه سنة 1500 بعد ما حكم اكتر من عشرين شهر و اختلف الامرا على موضوع سلطنه حد جديد لكن طومان باى انحاز لجان بلاط و سلطنه ضد رغبة الامرا و العسكر.
عملاته و ألقابه
[تعديل]عملات السلطان قانصوه قليله و مفيش منها غير شوية دنانير و فلس فريد من نوعه. ظهرت على العملات الألقاب دى : " السلطان الملك الظاهر ابو سعيد " و " السلطان الملك ابو سعيد ". و اتكتب دعا : " عز نصره ".
المراجع
[تعديل]- ابن إياس: بدائع الزهور فى وقائع الدهور، الهيئة المصرية العامة للكتاب، 1982
- ابن تغرى: النجوم الزاهرة فى ملوك مصر و القاهرة، دار الكتب و الوثائق القومية، مركز تحقيق التراث، القاهرة 2005، ISBN 977-18-0373-5
- شفيق مهدى ( دكتور) : مماليك مصر و الشام, الدار العربية للموسوعات, بيروت 2008.
| الناصر محمد بن قايتباى | مدة الحكم: اكتر من 20 شهر | جان بلاط |
