شهاب الدين أبو السعادات
| شهاب الدين أبو السعادات هوه حاكم مصر رقم 430 |
|---|
| ||||
|---|---|---|---|---|
| معلومات شخصيه | ||||
| تاريخ الميلاد | 27 مايو 1419 | |||
| تاريخ الوفاة | سنة 1430 (10–11 سنة) | |||
| الاب | المؤيد شيخ | |||
| معلومات تانيه | ||||
| المهنه | سياسى | |||
تعديل مصدري - تعديل  | ||||
الملك المظفر شهاب الدين ابو السعادات احمد ابن المؤيد شيخ ( اتولد فى القاهره ح 1420 ) ، سلطان مصر و سابع سلاطين الدوله المملوكيه البرجيه ( الشركسيه). بيعتبر أصغر سلطان فى تاريخ مصر و تانى اصغر واحد يقعد على عرش مصر (بعد الملك احمد فؤاد التانى). قعد على عرش مصر سنة 1421 لمدة تمن تشهر و هو لسه ماكملش سنتين بعد وفاة ابوه السلطان المؤيد ابو نصر شيخ. امه كان اسمها " سعادات ".
بعد وفاة السلطان ابو نصر شيخ سنة 1421 اتفق الامرا على تنصيب ابنه الرضيع شهاب الدين ابو السعادات احمد. ابن إياس بيوصف الحدث ده بقوله : " لم يقع لواحد من من ابناء الملوك بمصر أن تسلطن و هو فى دى السن ". الامرا جابوا ابو السعادات و قعدوه على حصان و هو عمال يعيط و قعدوه على عرش السلطنه و هو على حجر مرضعه ، ولما دقت الكوسات فجاءه فى حفلة التنصيب اتخض الطفل و اغم عليه و حصله حول فى عينيه فضل ملازمه طول حياته.
الامير " الطنبغا القرمشى " اتعين وصى على السلطان الرضيع لكن إكمنه كان فى تجريده فى الشام قام الامير ططر بمهمة الوصى على ما يرجع ، لكن ططر كان امير قوى وليه نفوذ كبير فعزل بعد شويه " الطنبغا " واتجوز " سعادات " ام السلطان الرضيع و لما ثار النواب فى الشام عليه اخد السلطان ابو السعادات وراح بيه ع الشام يحاربهم و بعد ما غلبهم خلعه و اتسلطن مكانه و طلق " سعادات " تانى يوم من خوفه منها من عملته. الظاهر ططر كان هو الحاكم الفعلى لمصر.
شهاب الدين ابو السعادات قعد على عرش مصر تمن تشهر. بيقول المقريزى عن خلعه : " فما كان أغناه عن دى السلطنة، ما استفاد منها إلا الحول فى عينيه ".
ألقابه وعملاته
[تعديل]- ظهر اسمه و ألقابه على عملاته بالشكل ده : السلطان الملك المظفر ، السلطان الملك ابو الفتح ، الملك المظفر.
- ظهر له دعائين : " خلد الله ملكه ونصره " ، و " خلد الله ملكه ".
- ليه درهم ظهرت عليه حاجه مهمه و هى كنية " ابو الفتح " مع إن كنيته كانت " ابو السعادات " . كنية " ابو الفتح " كانت فى الواقع كنية " الظاهر ططر " اللى خلعه من السلطنه و اتسلطن مكانه ، و ده ممكن يبين انه ططر كان بيجهز نفسه لإعلان سلطنته. الحاله دى بتعتبر فريده عمرها ما حصلت فى تاريخ مصر.
| المؤيد شيخ | مدة الحكم: تمن تشهر | الظاهر ططر |
المراجع
[تعديل]- ابن تغرى : النجوم الزاهرة فى ملوك مصر و القاهرة, الحياة المصرية ، القاهرة 1968.
- محمود بن احمد البدر العينى ، الروض الزاهر فى سيرة الملك الظاهر " ططر " ، دار الانوار ، القاهره 1370هـ
- المقريزى : السلوك لمعرفة دول الملوك, دار الكتب, القاهرة 1996.
- شفيق مهدى ( دكتور) : مماليك مصر و الشام, الدار العربية للموسوعات, بيروت 2008.
