لغة برمجه
هى اى لغة متصممه عشان تمكن الناس من التحكم فى الاجهزه الالكترونيه, بالزات الكومبيوترات, عن طريق اوامر مكتوبه. بتتقسم لغات البرمجة لانواع كتيرة حسب المستوى بتاعها وحسب قربها للغات بتاعت الناس ففى لغات مستوى-عالى يعنى اوامرها ممكن تتقرى زى اللغات الحيه (مثال "بيزك" (BASIC) و "سمال توك" (Smalltalk)) و لغات مستوى-واطى اللى قريبة اكتر من لغة الاله (مثال "اسمبلى" (Assembly)), لكن اللغات الاكتر استخداما فى البرامج الكبيره هيه اللغات اللى مستواها عالى (مثال "سى" (C) و "چاڤا" (Java))
انواع لغات البرمجه
[تعديل]
فيه انواع كتير من لغات البرمجه من ساعت ما طلعت وكل فتره بيطلع نوع جديد. معظم اللغات مش تبع نوع واحد بس لكنها بتاخد خصايص من كذا نوع, عشان كده صعب اننا نحدد نوع لكل لغه لكن أهم و اشهر الانواع هما:
البرمجة الاعلانيه(Declarative Programming)
[تعديل]النوع ده من لغات البرمجه بيوصف المشكله اللى مفروض البرنامج يحلها لكنه عامة مش بيقول المشكله تتحل ازاى. توصيف المشكله بيتم باستخدام المنطق, حل المشكله بيكون نظام من الاكسيومس(بالعربى:البديهيات,بالانجليزى:Axioms), من امثلة اللغات دى : الليسب:LISP, برولوجProlog وحاجات تانيه. لغات البرمجه دى بتكون اسهل فى القرايه و اسهل فى الفهم للانسان.
البرمجه الالزاميه(Imperative Programming)
[تعديل]لغات البرمجه الالزاميه بتوصف النظام بحالات مختلفه, فى الاول البرنامج بيكون فى حاله معينه والكومبيوتر بيكون عنده خطوات يمشى عليها عشان يعمل حاجه معينه. اتباع الخطوات دى بيخلى حالة البرنامج تتغير. لغات البرمجه دى اوسع فى الانتشار عشان هيا اسهل فى الاستخدام.
البرمجه الوظيفيه(Functional Programming)
[تعديل]البرمجه الوظيفيه بتتعامل مع البرنامج زى الدوال الموجوده فى علم الرياضيات, البرنامج بيستقبل مدخلات(Input)وشوية معلومات بيستخدمها عشان يطلع مخرجات(Output). البرنامج مش بيغير اى حاجه ملهاش علاقه بالعمليات الحسابيه اللى بتم على المدخلات.
البرمجه الاجرائيه(Procedural Programming)
[تعديل]فى البرمجه الاجرائيه البرنامج بيكون متقسم لاجزاء, كل حته بتعمل حاجه معينه بس وبيُفضل ان كل حته تعمل حاجه واحده بس. البرنامج بيكون ماشى فى خطوات متحدده يعنى فى الاول يعمل كده وبعدين كده و هكذا.من امسلة اللغات دى الباسكال و السى.
البرمجه كائنية التوجه(Object Oriented Programming)
[تعديل]من اشهر واهم انواع البرمجه الموجوده الايام دى وفيها محاكاه للحاجات الموجوده فى بيئة المشكله, الداتا والدوال اللى بتشتغل على الداتا دى محطوطه فى وحده واحده اسمها الكائن(Object) كل كائن ليه خصايص(Properties) دوال(Methods) اللى هيا حاجات بيعملها الكائن على سبيل المسال الكائن:كلب ليه خصايص زى الوزن(Weight) و اللون(Color) وليه دوال زى:النباح(bark()) والشم(Smell()). معظم الحاجات ممكن يتعملها تمثيل فى البرامج زى حساب البنك, الصوره, المكتب, اللعيب اللى انا بلعب بيه فى الڤيديو جيم و هكذا. كل الكائنات بيتم تخزينها فى الذاكره بتاعة الكومبيوتر. معظم لغات البرمجه الحديثه هى كائنية التوجه زى السى شارب والجافا وغيرها كتير.
قواعد لغات البرمجه
[تعديل]كل لغة برمجه ليها شوية قواعد يعنى ممكن تعمل ايه و ممكن متعملش ايه من هذه القواعد:
- الارقام و مدى صحتها: انواع الارقام الموجوده و مداها اد ايه كبير ولا صغير.
- الكلمات: المحفوظه منها(يعنى اللى مينفعش نستخدمها عشان هيا بتستخدم فى لغة البرمجه نفسها(Reserved Words))- هل اللغه بيفرأ فيها الحروف كبيره ولا صغيره (case-sensitivity)
- حدود اللغه: امكانيات اللغه فى عمل التطبيقات والبرامج.
