গংগুবাই কোঠেৱালী

গংগুবাই হৰজীৱনদাস Gangubai Harjivandas
জন্ম	গংগুবাই হৰজীৱনদাস ১৯৩৯ কাঠিয়াৱাড়, ব্ৰিটিছশাসিত ভাৰত বৰ্তমানৰ গুজৰাট, ভাৰত
মৃত্যু	২০০৮ (বয়স : ৬৮-৬৯) মুম্বাই, মহাৰাষ্ট্ৰ, ভাৰত
অন্য নাম	গংগুবাই কোঠেৱালী গংগুবাই কাঠিয়াৱাড়ী
পেচা	যৌনকৰ্মী দালাল

গংগুবাই হৰজীৱনদাস (ইংৰাজী: Gangubai Harjivandas)^{[টোকা 1]} পৰিচিত আৰু জনপ্ৰিয় নাম হৈছে গংগুবাই কোঠেৱালী^{[টোকা 2]} আৰু গংগুবাই কাঠিয়াৱাড়ী^{[টোকা 3]}৷ তেওঁ আছিল এগৰাকী ভাৰতীয় পতিতা আৰু কুৰি শতিকাৰ '৭০ৰ দশকত মুম্বাইৰ কামাথিপুৰা এলেকাত গঢ় লৈ উঠা এটা পতিতালয়ৰ গৰাকীনী বা 'ম্যাডাম'৷ ^{[3] [4]}

২০১১ চনত প্ৰকাশিত হুছেইন জাইদীৰ অকাহিনীমূলক অপৰাধভিত্তিক গ্ৰন্থ মাফিয়া কুইনচ অৱ মুম্বাইত গংগুবাইৰ বিষয়ে উল্লেখ আছে৷ ^[5]

২০২২ চনৰ ২৫ ফেব্ৰুৱাৰীত মুক্তি লাভ কৰা সঞ্জয় লীলা ভাঞ্চালীৰ দ্বাৰা নিৰ্দেশিত আৰু মুখ্য চৰিত্ৰত আলিয়া ভাটৰ দ্বাৰা অভিনীত হিন্দী ভাষাৰ আত্মজীৱনীমূলক কথাছবি 'গংগুবাই কাঠিয়াৱাড়ী'য়ে গংগুবাই হৰজীৱনদাসৰ জীৱনদ্দশাক প্ৰতিনিধিত্ব কৰিছে৷ ^[4]

জীৱন

১৯৪০ৰ দশকৰ গুজৰাটৰ কাঠিয়াৱাড় গাঁৱত গংগুবাইৰ জন্ম হয়৷ জন্মতে তেওঁৰ নাম আছিল গংগা হৰজীৱনদাস৷ যৌৱনাৱস্থাতে গংগুবাইয়ে পিতৃৰ গাণনিক ৰামনিক লালৰ লগত মুম্বাইৰ চহৰলৈ পলাই আহে৷ ইয়াৰ আগতে দুয়োয়ে সংগোপনে বিবাহ-পাশত আবদ্ধ হয়৷ কিন্তু গিৰিয়েক ৰামনিকে গংগুবাইৰ লগত প্ৰবঞ্চনা কৰে আৰু তাইক পতিতাবৃত্তিত পাঁচশ টকাৰ বিনিময়ত বিক্ৰী কৰে৷ গংগুবাইৰ জীৱনক ৰেখাপাত কৰা হুছেইন জাইদীৰ গ্ৰন্থ 'মাফিয়া কুইনছ অৱ মুম্বাই'ত গংগুবাইৰ বিষয়ে অনেক গুৰুত্বপূৰ্ণ তথ্য সন্নিৱিষ্ট হৈছে৷ ^[6][7] লিখক হুছেইনৰ মতে, গংগুবাইৰ উচ্চতা বৰ বেছি নহয়৷ পাঁচ ফুট পাঁচ ইঞ্চিমানহে হ'ব৷ পতিতাবৃত্তিৰ লগত অনাকাংক্ষিতভাৱে পৰিচিত হৈ গংগুবাইয়ে পূৰ্বৰ গংগা নামটো সলাই পেলায় আৰু তাৰ ঠাইত গংগু বুলি আত্মপৰিচয় দিবলৈ আৰম্ভ কৰে৷ ^[4]

প্ৰথমাৱস্থাত গংগুবাইয়ে একাধিক অস্বস্তিদায়ক পৰিস্থিতিৰ সমুখীন হৈছিল যদিও পাছলৈ মুম্বাইৰ আণ্ডাৰৱৰ্ল্ডৰ সান্নিধ্যলৈ আহে আৰু সেইসূত্ৰেই চৌপাশৰ অঞ্চল আৰু সমাজত পৰিচয় লাভ কৰে৷ গংগুবাইৰ প্ৰতিৰক্ষাৰ দায়িত্বত আছিল কৰিম লালা৷ কৰিম লালাক সেইসময়ত মুম্বাইৰ এজন কুখ্যাত ডন হিচাপে জনা যায়৷ কামথিপুৰাৰ এই এলেকাটো কৰিম লালাৰ অধীনত আছিল৷ ^[8]কোৱা হয় যে, গংগুবাইয়ে কৰিম লালাক ৰাখী পিন্ধাইছিল৷ কিয়নো গংগুবাইক দুবাৰকৈ ধৰ্ষণ কৰা তাৰ এজন গুণ্ডাৰ পৰা কৰিম লালাই ৰক্ষা কৰিব বুলি প্ৰতিশ্ৰুতিবদ্ধ হৈছিল৷ মুম্বাইৰ কামাথিপুৰাত গংগুবাইয়ে এগৰাকী যৌনকৰ্মী হিচাপে কাম আৰম্ভ কৰে আৰু ক্ৰমাৎ সেই অঞ্চলত থকা বহুকেইখন পতিতালয়ৰ গৰাকীনী হয় আৰু সেইবোৰৰ পৰিচালনাও কৰে৷ স্থানীয় 'ঘৰৱালী' নিৰ্বাচন জয়ী হোৱাৰ পিছত গংগুবাইয়ে নিজৰ নামৰ পিছত 'ক'ঠেৱালী' উপাধি সংযুক্ত কৰে৷ কম বয়সতে গংগুবাই পতিতালয়ৰ ম্যাডাম হিচাপে স্বীকৃত হয়৷ সাধাৰণতে এই নিৰ্বাচনবোৰৰ জৰিয়তে কামাথিপুৰাৰ যৌন কৰ্মীৰ মাজত তেওঁলোকৰ স্থিতি আৰু স্থান নিৰ্ধাৰণ কৰা হৈছিল৷ জাইদিয়ে কিতাপখনত উল্লেখ কৰা অনুসৰি, গংগুবাইয়ে কেতিয়াও নাৰীক নিজৰ ইচ্ছাৰ অসন্মতিত যৌন বৃত্তিলৈ টানি অনা নাছিল৷ কিশোৰীক তেওঁ কেতিয়াও পতিতাবৃত্তি গ্ৰহণ কৰিবলৈ নিদিছিল৷ ^[8]আনকি ব্যৱসায় আৰু অৰ্থৰ পৰিৱৰ্তে নাৰীৰ এই স্বাধীনতাক অগ্ৰাধিকাৰ দিয়া গংগুবাইয়ে সেইসময়ত একমাত্ৰ 'ম্যাডাম' আছিল৷ ^[4]

গংগুবাইয়ে যৌন কৰ্মী আৰু অনাথ শিশুৰ কল্যাণ আৰু উত্তৰণৰ হকে কাম কৰিছিল৷^[9]

ৰেড লাইট এলেকাবোৰৰ সুৰক্ষাৰ অনুমোদন বিচাৰি গংগুবাইয়ে ভাৰতৰ প্ৰধান মন্ত্ৰী জৱাহৰলাল নেহৰুকো সাক্ষাৎ কৰিছিল৷^[8]

জনপ্ৰিয় মাধ্যমত

মুম্বাইৰ অনুসন্ধানমূলক সাংবাদিক আৰু লেখক এছ. হুছেইন জাইদীয়ে সাংবাদিক জন বৰ্গেছৰ সৈতে লগ হৈ লিখা মাফিয়া কুইনছ অৱ মুম্বাইত সন্নিৱিষ্ট তেৰগৰাকী মুম্বাইৰ নাৰীৰ ভিতৰত গংগুবাইৰ জীৱনকো সামৰিছে৷ এই গ্ৰন্থখন ১৫ এপ্ৰিল ২০১১ চনত 'ট্ৰেংকুবাৰ'-এ প্ৰকাশ কৰিছিল৷ গ্ৰন্থখনৰ ভাষা-ইংৰাজী৷ ^[10]

হুছেইন জাইদীৰ গ্ৰন্থখনৰে এটা অধ্যায়ক আধাৰ হিচাপে লৈ নিৰ্মাণ কৰা হিন্দী ভাষাৰ কথাছবি 'গংগুবাই কাঠিয়াৱাড়ী'য়ে ২০২২ চনৰ ২৫ ফেব্ৰুৱাৰীত ভাৰতৰ ছবিগৃহত মুক্তিলাভ^[11] কৰে৷ এই ছবিখনৰ পৰিচালক হৈছে সঞ্জয় লীলা ভাঞ্চালী আৰু মুখ্য চৰিত্ৰত অভিনয় কৰিছে আলিয়া ভাটে৷ ছবিখনে দৰ্শক-সমালোচকৰ পৰা ইতিবাচক সঁহাৰি লাভ কৰে৷^[12][13][14]

টোকা

1. সন্মানীয় প্ৰত্যয়, কেতিয়াবা ভাৰতীয় মহিলাৰ নামৰ আগত যোগ কৰা হয়।]}^[1] ইয়াত প্ৰকৃত নামটো হৈছে গংগু বা গংগা৷
2. কোঠেৱালীৰ আক্ষৰিক অৰ্থ হৈছে দেহোপজীৱিনী৷ ক'ঠা মানে কোঠা আৰু ৱালী মানে গৰাকীনী৷ অৰ্থাৎ পতিতালয়ৰ গৰাকীনী বা 'মেডাম'৷^[2]
3. এইটো নামত তেখেতৰ জন্মস্থান পশ্চিম ভাৰতৰ সৌৰাষ্ট্ৰৰ অন্তৰ্গত কাঠিয়াৱাড়ক সূচাইছে৷

তথ্যসূত্ৰ

1. McGregor, R. S. (1993). The Oxford Hindi-English Dictionary. Oxford University Press. পৃষ্ঠা. 719. http://dsal.uchicago.edu/cgi-bin/app/mcgregor_query.py?page=719. 
2. McGregor, R. S. (1993). The Oxford Hindi-English Dictionary. Oxford University Press. পৃষ্ঠা. 216. http://dsal.uchicago.edu/cgi-bin/app/mcgregor_query.py?page=216. 
3. "Real Vs. Reel Images Of Characters And Places Showcased In 'Gangubai Kathiawadi'". ScoopWhoop. Mar 02, 2022 at 15:59. https://www.scoopwhoop.com/entertainment/real-vs-reel-images-from-gangubai-kathiawadi/। আহৰণ কৰা হৈছে: 2 March 2022. 
4. Jain, Sanya (March 01, 2021 9:19 am IST). "Who Was Gangubai Kathiawadi: The Woman Alia Bhatt Will Portray In Her Latest Film". NDTV. https://www.ndtv.com/offbeat/who-was-gangubai-kathiawadi-the-woman-alia-bhatt-will-portray-in-her-latest-film-2380290। আহৰণ কৰা হৈছে: 2 March 2022. 
5. "আৰ্কাইভ কপি". Archived from the original on 2022-02-19. https://web.archive.org/web/20220219130919/http://books.rediff.com/book/mafia-queens-of-mumbai--stories-of-women-from-the-ganglands--english---paperback-/9789380283777। আহৰণ কৰা হৈছে: 2022-03-02. 
6. "Know Gangubai Kothewali, The Legendary Brothel Madam Alia Bhatt Will Be Playing In SLB's Next" (en ভাষাত). Desimartini. 2019-09-22. https://www.desimartini.com/news/martini-shots/trending-top-list/know-gangubai-kothewali-the-legendary-brothel-madam-alia-bhatt-will-be-playing-in-slbs-next-article120431.htm। আহৰণ কৰা হৈছে: 2020-01-21. 
7. "गंगूबाई कोठेवाली-पति ने ₹500 में बेचा था,भंसाली उनपर फिल्म बनाएंगे" (hi ভাষাত). Quint Hindi. 2019-09-25. https://hindi.thequint.com/entertainment/bollywood/gangubai-khothewali-sanjay-leela-bhansali-film-alia-bhatt। আহৰণ কৰা হৈছে: 2020-01-21. 
8. Bhati, Divya (25 Feb, 2022). "Gangubai Kathiawadi - The Real Story of The Mafia Queen of Mumbai". jagarantv. https://www.jagrantv.com/en-show/gangubai-kathiawadi-the-mafia-queen-of-mumbai-real-story-rc1015962। আহৰণ কৰা হৈছে: 2 March 2022. 
9. https://www.indiatvnews.com/entertainment/bollywood/who-is-gangubai-kathiawadi-husband-sold-rs-500-alia-bhatt-sanjay-leela-bhansali-film-580029
10. https://www.hindustantimes.com/books/review-mafia-queens-of-mumbai/story-GidcRlboZRr7eiNwIFR50N.html
11. https://www.imdb.com/title/tt10083340/
12. https://timesofindia.indiatimes.com/entertainment/hindi/movie-reviews/gangubai-kathiawadi/movie-review/89811379.cms
13. https://indianexpress.com/article/entertainment/movie-review/gangubai-kathiawadi-alia-bhatt-sanjay-leela-bhansali-spectacle-is-real-7790301/
14. https://www.theguardian.com/film/2022/feb/27/gangubai-kathiawadi-review-gutsy-indian-true-drama-alia-bhatt