Coordenaes: 16h 15m 37.27s, -8° 22′ 9.982″
18 Scorpii (18 Sco / HD 146233 / HR 6060 / GJ 616) ye una estrella nana mariella na constelación de Scorpius. Ta asitiada nel estremu norte de la mesma cerca de la llende con Ophiuchus, al noroeste de la estrella Zeta Ophiuchi. Tien magnitú aparente +5,50 y alcuéntrase a 45,7 años lluz del Sistema Solar.
Les carauterístiques físiques de 18 Scorpii son bien similares al Sol, polo que dellos astrónomos consideren que ye'l ximielgu solar más cercanu. De tipu espectral G2 V y estrella única, la so masa ye 1,012 vegaes la masa solar, el so radiu 1,02 - 1,03 vegaes el radiu solar y la so lluminosidá 1,05 vegaes la del Sol. La so metalicidá paez daqué mayor que la solar, en redol a un 5 - 12% mayor. La edá de 18 Scorpii envalórase nunos 4200 millones d'años, apenes 350 millones d'años más nuevu que'l Sol.
Otros parámetros como velocidá de rotación o ciclu d'actividá magnética tamién son paecíos en dambes estrelles. Asina, 18 Scorpii completa una vuelta en 23 díes, en comparanza a los 25,7 qu'emplega'l Sol. Sicasí, el ciclu d'actividá magnética en 18 Scorpii puede ser de más amplitú que nel Sol polo que la so actividá cromosférica global podría ser significativamente mayor.
Estrella | Tipu espectral | Radiu (Rsol) | Masa (Msol) | Lluminosidá (Sol = 1) |
Temperatura (K) |
Metalicidá (Sol = 1) |
Edá (1) |
Rotación (díes) |
Ciclu d'actividá magnética (años) |
---|---|---|---|---|---|---|---|---|---|
18 Scorpii | G2V | 1,02 | 1,012 | 1,05 | 5789 | ~ 1,08 | 4200 | 23 | 9 - 13 |
Sol | G2V | 1 | 1 | 1 | 5777 | 1 | 4577 | 25,7 | 11 |
(1) = Millones d'años
Les especiales carauterístiques de 18 Scorpii faen d'esta estrella un oxetivu prioritariu na busca de planetes terrestres que puedan allugar vida.