Angeline Stickney

Angeline Stickney
Vida
Nacimientu 1 de payares de 1830
Nacionalidá Bandera de Estaos Xuníos d'América Estaos Xuníos
Muerte North Andover (es) Traducir, 3 de xunetu de 1892 (61 años)
Familia
Casada con Asaph Hall (1856 – valor desconocíu)
Fíos/es
Estudios
Estudios New-York Central College, McGrawville (en) Traducir
Llingües falaes inglés
Oficiu
Oficiu matemática, sufraxista
Cambiar los datos en Wikidata

Chloe Angeline Stickney Hall (1 de payares de 1830 – 3 de xunetu de 1892, North Andover (es) Traducir) foi una sufraxista, abolicionista y matemática d'Estaos Xuníos. Tuvo casada col astrónomu Asaph Hall. Nun usó'l so primer nome y foi conocida como Angeline Stickney Hall. Yera fía de Theophilus Stickney y Electa Cook.

Anque yera probe, pudo dir al Central College de McGraw (Nueva York) con ayuda de la so hermana Ruth. Estudió ciencies y matemátiques, faciendo trabayos en cálculu y matemática astronómica. El Central College yera una universidá progresista onde los estudiantes con recursos modestos, incluyendo muyeres y afroamericanos llibres, podíen llograr un grau universitariu. Foi entós cuando s'entusiasmó poles causes del sufraxu femenín y l'abolición de la esclavitú.

Angeline Stickney y Asaph Hall conociéronse nel Central College. Stickney yera dos años mayor que Hall.[1] Foi la so profesora de xeometría y alemán.[2] Mientres los sos díes xuntos como profesora y estudiante, Hall y el so compañeru de clase plantegáben-y cuestiones y problemes, convencíos de que Stickney nun podría solucionar, pero nunca fracasó nesta xera.[3]

Stickney y Hall casáronse n'Elkhorn (Wisconsin) el 31 de marzu de 1856. Darréu dempués de la boda, la pareya treslladóse a Ann Arbor por que Hall pudiera siguir cola so formación. Tres meses más tarde treslladáronse a Shalersville (Ohio).[2]

La residencia Stickney nel barriu de Georgetown de Washington, D.C.

Stickney animó a Hall a siguir na so busca de satélites de Marte cuando esti tuvo a puntu de cesar na so xera, afayando finalmente Fobos y Deimos.[4] El cráter más grande de Fobos, el cráter Stickney, foi nomáu nel so honor.[4]

Los cuatro fíos del matrimoniu foron educaos nel so llar y toos ellos terminaron estudiando na Universidá de Harvard. El so tercer fíu, Angelo Hall, foi ministru unitariu y escribió la so biografía. El so fíu mayor, Asaph Hall Jr., nació'l 6 d'ochobre de 1859 y foi direutor del Observatoriu Detroit ente 1892 y 1905. Los sos otros fíos foron Samuel (segundu fíu) y Percival (cuartu fíu); Percival Hall (1872–1953) foi'l segundu presidente de la Universidá Gallaudet, ente 1910 y 1946 (Percival sicasí nun yera sordu).

Llibros

[editar | editar la fonte]

Referencies

[editar | editar la fonte]
  1. ↑ Dick, Steven J. (2003). Sky and Ocean Joined: The US Naval Observatory 1830-2000 (n'inglés). Cambridge University Press. ISBN 9780521815994. Consultáu'l 9 de febreru de 2017.
  2. ↑ 2,0 2,1 Whitesell, Patricia S.. «Detroit Observatory: nineteenth-century training ground for astronomers». Journal of Astronomical History and Heritage 6 (2):  páxs. 69-106. http://www.detroitobservatory.umich.edu/JAHH2003/DetroitObservatoryArticle.pdf. Consultáu'l 9 de febreru de 2017. 
  3. ↑ «Famous wife Hall». Archiváu dende l'orixinal, el 2012-08-26. Consultáu'l 9 de febreru de 2017.
  4. ↑ 4,0 4,1 Rothery, David A. (2015). Moons: A Very Short Introduction (n'inglés). Oxford University Press. ISBN 9780191054211. Consultáu'l 9 de febreru de 2017.

Enllaces esternos

[editar | editar la fonte]