Coordenaes: 15h 46m 11.255s, 15° 25′ 18.549″
Beta Serpentis (β Ser / β Serpentis / 28 Serpentis)[8] ye un sistema estelar na constelación de Serpens. Recibe'l nome tradicional de Chow, del mandarín 周, zhōo, en referencia a la dinastía Zhou. Alcuéntrase a 155 años lluz del Sistema Solar y forma parte de la corriente d'estrelles de l'Asociación estelar del sietestrellu.
La estrella principal, Beta Serpentis A, ye una subxigante blanca de tipu espectral A2IV de magnitú aparente de +3,65. La so temperatura superficial algama los 8549 K y la so lluminosidá ye 61 vegaes superior a la lluminosidá solar. Xira sobre sigo mesma a gran velocidá —la so velocidá de rotación ye de siquier 189 km/s—, siendo el so periodu de rotación inferior a 23 hores. Tien una masa ente 2,4 y 2,5 mases solares.[9]
Acompaña a la subxigante Beta Serpentis B, una nana naranxa de tipu K3V y magnitú +9,9. Separada d'ella siquier 1500 UA, emplega más de 31.000 años en completar una órbita. Una tercer estrella de magnitú +10,7, Beta Serpentis C, tamién forma parte del sistema; ye coles mesmes una nana naranxa que'l so radiu orbital alredor del par AB ye igual o mayor de 9500 UA, lo qu'implica un ampliu periodu cimeru a 500.000 años.[9]