Bóveda

Bóveda
Techu

Una bóveda^[1] ye una obra de mampostería o fábrica de forma curva, que sirve pa cubrir l'espaciu entendíu ente dos murios o una serie de pilastres alliniaes.

Ye una estructura bien apoderada pa cubrir espacios arquiteutónicos amplios con pieces pequeñes. La so xeometría puede ser de simple o doble combadura. N'edificaciones modernes el términu aplícase a estructures de cubiertes curvaes, nes que la espesura ye bien pequeña comparada col anchu y el llargor.

Tanto nes antigües bóvedes como nes modernes la solicitación predominante nos sos elementos ye de compresión. Les sos tensiones aseméyense a les d'un arcu, o un conxuntu d'arcos conformando una superficie.

Los materiales emplegaos na so construcción pueden ser de piedra, llamaos doveles, lladriyu, aceru, formigón armao, etcétera. Les doveles pueden dir apareyaes ensin trabazón, anque lo habitual ye que se xunan con un material aglomerante o morteru.

Na Historia de l'Arquiteutura les bóvedes, de lladriyu o piedra, tuvieron un papel destacáu na edificación que perdieron cola xeneralización de les téuniques y materiales de construcción modernos: primero l'aceru y dempués el formigón armao fixeron posible edificaciones de grandes lluces, enantes namái abovedaes.

Sicasí, les bóvedes de formigón armao son utilizaes abondosamente n'inxeniería civil pa construyir galeríes, túneles, cubiertes de grandes lluces y, polo xeneral, toes aquelles obres onde los elementos trabayando a flexón resulten desventayosos dende un puntu de vista téunicu y económicu.

Referencies

1. Esti términu apaez nel Diccionariu de l'Academia de la Llingua Asturiana. Ver: bóveda

Enllaces esternos