Coordenaes: 5h 32m 12.753s, 18° 35′ 39.244″
CE Tauri (CE Tau / 119 Tauri / HD 36389 / HR 1845) ye una estrella na constelación de Tauru, asitiada xusto percima de la constelación d'Orión. Ye una de les estrelles más grandes que se conocen, con un radiu 525 vegaes más grande que'l radiu solar o, lo que ye lo mesmo, 2,4 UA.
CE Tauri ye una fría superxigante colorada de tipu espectral M2 con una lluminosidá averada de 47.000 soles y una temperatura superficial de 3700 K. Les sos carauterístiques físiques son similares a otres estrelles más conocíes como Betelgeuse (α Orionis) o Antares (α Scorpii). Tien una alta metalicidá, con un conteníu en fierro un 30% superior al del Sol. La so masa, ente 12 y 15 vegaes mayor que la masa solar, dexa concluyir que va acabar los sos díes como una brillosa supernova.
Al igual qu'otres superxigantes coloraes, CE Tauri ye una estrella variable. Ta clasificada como una variable semirregular con oscilaciones nel so rellumu dende magnitú +4,23 a +4,54 nun periodu de 165 díes.
CE Tauri alcuéntrase a una incierta distancia de 1900 años lluz del Sistema Solar, pero yá que esti valor ta suxetu a un altu grau d'error, la so distancia real pue tar entendida ente 1300 y 3600 años lluz.