Coordenaes: 14h 12m 15.805s, 2° 24′ 33.953″
CU Virginis (CU Vir / HD 124224 / HR 5313) ye una estrella variable na constelación de Virgu de magnitú aparente +5,01. Alcuéntrase a 262 años lluz del Sistema Solar.
De tipu espectral A0VpSi, CU Virginis ye una estrella magnética químicamente peculiar, con un campu magnéticu dipolar oblicuu. Clasificada como variable Alfa2 Canum Venaticorum, pertenez a un grupu d'estrelles que los sos espectros presenten llinies realzaes de dalgunos elementos, variando la so intensidá cola rotación de la estrella. α2 Canum Venaticorum y CW Virginis —ésta última tamién na constelación de Virgu— son dos representantes d'esti grupu. El periodu de CU Virginis (0,5207 díes) ye unu de los más curtios dientro d'esti tipu de variables.
CU Virginis amuesa una emisión continua en llonxitú d'onda de radio, interpretada como emisión xirosincrotrón procedente d'una fina capa magnetosférica. Reparóse un componente polarizáu circularmente y altamente direccional que s'asolapa cola emisión continua dos veces por rotación, cuando la exa magnética asítiase nel planu del cielu; esta emisión paez estable nuna escala de tiempu de dellos años.