Conquista cristiana de la Península Ibérica

Denómase Reconquista o "Conquista Cristiana de la Península Ibérica" al procesu históricu nel que los reinos cristianos de la Península Ibérica buscaron el control peninsular en poder del dominiu musulmán. Esti procesu tuvo llugar ente los años 722 (fecha probable de la rebelión de Pelayu) y 1492 (final del Reinu nazarí de Granada).

El términu Reconquista ye'l que más s'usó pa referise al procesu d'estensión a los dominios de Castiella y otros reinos cristianos peninsulares escontra'l sur, pero ye un términu mediatizáu ideolóxicamente, darréu qu'alude al deséu de recuperación d'una integridá nacional, nuna dómina na que nun esistía nin la idea d'España como nación, nin siquiera la propia idea de nación. El sentíu propiu del procesu nun yera más que'l de recuperación de los territorios baxo dominiu musulmán pa la cristiandá, lo mesmo que se falaba de Reconquista nel casu de les Cruzaes.

El términu «Reconquista»: historiografía y tradición

Según dellos académicos^[1], el términu ye históricamente inesautu, darréu que los reinos cristianos que «reconquistaron» el territoriu peninsular constituyéronse con posterioridá a la invasión islámica, a pesar de los intentos de delles d'estes monarquíes por presentase como herederes direutes del antiguu reinu visigodu. Trataríase más bien d'un enfotu de llexitimación política d'estos reinos, que considerábense herederos y descendientes reales de los visigodos, y tamién l'intentu de los reinos cristianos (especialmente Castiella) de xustificar les sos conquistes, al considerase herederos de sangre de los godos.

Sicasí, al-Andalus ye tan heredero de la Hispania visigoda como Asturies: los cabezaleros árabes, acompañaos de mercenarios bereberes, nun traíen nenguna civilización ñueva, porque l'islam (ensin cuntar la llingua árabe y la relixón, que sí que vienen d'Arabia) nun esistía tovía; igual que Roma como la coñocemos nun esiste dafechu fasta'll sieglu I, l'islam fórmase adulces dende'l sieglu VII fasta'l XI, como una evolución de les distintes cultures qu'había: la grecorromana nel Mediterraneu Oriental, la romana nel occidental, y la persa n'Irán-Iraq. D'esta miente, al-Andalus sería una Hispania Romano-Visigoda evolucionando, tresformada pola influencia oriental (sobre too la d'Iran ya Iraq) y poles mesmes creaciones surdíes dientro d'al-Andalus. Aparte, Asturies, que yera una rexón perprimitiva, ye heredera "menor" de la Hispania Romano-Visigoda, pero non como al-Andalus, porque les sos principales influencies según avancen los sieglos vendríen de Francia, Italia y un pocu d'al-Andalus. Asina ye que, xunto con "reconquista", puen utilizase los términos "guerres relixoses" o "conquista cristiana".

Dalgunos autores propunxeron con pocu ésitu'l términu alternativu de «conquista cristiana», que nun tien nenguna implicación ideolóxica; sicasí, especialistes y profanos siguen usando «reconquista» pa referise a esti periodu históricu.

Referencies

1. Abilio Barbero y Marcelo Vigil son los historiadores qu'acuñaron esta teoría